- Сирек быуат ғүмерен ауыл хужалығына арнаған “Үҙәк” МТС-ының Ҡырмыҫҡалылағы “Нива” филиалы инженеры Рафаил Ғибәҙуллин да яҙын-йәйен яңы уңышты үҫтереү, ә әлеге мәлдә уңышты йыйып алыу өсөн ҙур тырышлыҡ һала. Ул бик яуаплы кеше, һәр саҡ техника янында, ремонт осоронда төҙәтелеп бөтмәһә, ҡайтырға ла ашыҡмай. Рафаил Фәттәх улы техника тотҡарлыҡһыҙ эшләһен өсөн алмаш частарға заказ биреп, алып ҡайта, уның комбайндарҙы төҙәтеү бригадаһы һәр саҡ һаҡта тора. Был яуаплы эш уға ышанып тапшырылған, - тип һөйләне ошо хужалыҡтың әйҙәүсе агрономы Рәүф Мортазин. – Уңышты үҫтереүҙә һәм йыйыуҙа һәр кемдең өлөшө ҙур. Яҡшы уңыш алыу өсөн ҙур эштәр башҡарылды – орлоҡтар ваҡытында сәселде, минераль ашламалар тейешле күләмдә индерелде, шытымдарҙы тәрбиәләү буйынса бөтә кәрәкле саралар үткәрелде. Әлеге көндәрҙә эштәрҙең яртыһы бөттө. Ҡуҙаҡлы культураларҙан 300 гектар ерҙә борсаҡ йыйып алынды. Был культура уңышының гектар ҡеүәте: рокет сортлыһы - 30 центнер, лумп - 45 центнер тәшкил итә. 350 гектарҙа сәселгән ужым бойҙайы ла йыйылды, уның гектар ҡеүәте 30 центнер. Ә ярауай бойҙай сабылды. Игенселәр был көндәрҙә 650 гектарҙы биләгән ужым баҫыуҙарын сәсергә төштө, уның 250 гектары сәселде лә инде. Үҫтерелгән уңышты урып йыйыуға иң тәжрибәле комбайнсылар Рөстәм Рәхимов, Азамат Гапиров, Азат Хәсәнов йәлеп ителде. Әмир Абдрафиҡов, Радик Сабитов, Венер Йәрмөхәмәтов йөк машиналарында иген ташыйҙар. Ә иң тәүҙә механизаторҙар Сергей Морин, Айбулат Хәйруллин, Данис Ғәйфуллин, Вячеслав Лежнев, Александр Никитин, Илфат Аҙнағолов, Фәүзи Нурғәлиев тупраҡты әҙерләү эштәрен башҡарҙы. Мырҙала һәм Һарт-Шишмәлә урынлашҡан ырҙын табаҡтарында Венер Аҙнағолов етәкселек итә. Ул игенде ҡабул итеп, артабан елләтеп-киптереп, эште теүәл ойоштора. Бүлексә управляющийы Айҙар Бикташев һәм агроном Рөстәм Заһиҙуллин бөтә эштәрҙе кәңәшләшеп башҡара.
Әлеге көндәрҙә аграрийҙарҙың төп бурысы – уңышты юғалтыуҙарһыҙ үҙ ваҡытында йыйып алыу һәм киләсәккә нигеҙ һалыу. Был бурысты ауыл эшсәндәренең аҙағынаса теүәл атҡарыуына шик юҡ.
Фәниә Сәлимгәрәева.
Фирүзә РӘХМӘТУЛЛИНА фотоһы.