Республикабыҙҙың төрлө төбәктәрендә булдыҡ. Тыуған яғыбыҙҙың тәбиғәте бик гүзәл, юлда мәғрур тауҙарға, сылтырап аҡҡан йылғаларға, ялтырап ятҡан күлдәргә, киң яландарға, ҡуйы урмандарға ҡарап һоҡланабыҙ һәм ләззәт алабыҙ.
Үткән йәй бигерәк тә күп йөрөнөк. Өс тапҡыр Баймаҡ районында булдыҡ. Беренсе тапҡыр Ғәҙелша шарлауығына, ике тапҡыр Мөжәүир хәҙрәттең ҡәберенә барҙыҡ. Уның йорт-музейында, мәсетендә булдыҡ. Ҡайтышлай һоҡланғыс Талҡаҫ күлендә туҡтап, һыу инеп, ял итеп ҡайттыҡ. Уның таҙалығына, үтә күренмәле булыуына хайран ҡалдыҡ.
Ғафури районындағы Еҙем йылғаһы эргәһендәһе Уҡлы ҡаяла, Киндерле мәмерйәһендә, Башҡортостандың географик үҙәгендә булырға тура килде. Тауҙарҙың хозурлығы, мәмерйәләрҙең серлелеге арбап, үҙенә әйҙәп тора. Улар беҙгә ниндәйҙер көс биргәндәй булды.
Шулай уҡ йыл һайын йәйге миҙгелдә Көйөргәҙе районындағы минераль һыуҙары һәм шифалы батҡағы менән популяр булған Яҡут күленә барабыҙ. Рәсәйҙең төрлө төбәктәренән килгән кешеләр менән һаулыҡтарыбыҙҙы нығытабыҙ. Яҡут күле – тәбиғәт ҡомартҡыларының береһе, ул «Яҡут тоҙло сығанағы» исеме аҫтында билдәле. Был күлдең батҡағы менән ыуынып, дауаланғандан һуң аяҡ быуындарының һыҙлауы байтаҡ ваҡытҡа баҫылып тора. Үҙебеҙ менән таныштарыбыҙҙы ла алып барырға тырышабыҙ.
Ә инде ике йыл рәттән Ҡырымда Ҡара диңгеҙ буйындағы “Мрия” шифаханаһында ял итеп ҡайтыуыбыҙҙы ожмахта булғанға тиңләр инем. Бындағы тәбиғәтте, шифахананың хеҙмәтләндереү, дауалау кимәлен яҙып ҡына аңлатып бөтөрөрлөк түгел. Ашарға нимә бешерергә тип аптырарға түгел, һый-ниғмәттәрҙең ниндәйе генә юҡ! Мәңге күрмәгән нимәләрҙе күреп, тәмләмәгән ризыҡтарҙы тәмләп ҡайттыҡ.
Быйыл йәй иһә ике машинала Краснодар өлкәһенең Анапа ҡалаһы янындағы Витязев ҡасабаһында, Ҡара диңгеҙ яры буйында ял итергә барҙыҡ. Береһендә ҡыҙыбыҙ ғаиләһе менән барһа, икенсеһендә - тормош иптәшем менән беҙ һәм ҡоҙағыйыбыҙ менән ҡоҙасабыҙ. Быйылғы сәйәхәт бигерәк тә оҡшаны. Машина менән барғанда ниндәй генә ерҙәрҙе үтмәнек! Бына улар - Татарстан Республикаһы, Ырымбур, Воронеж, Волгоград, Ростов өлкәләре, Краснодар крайы. Бер аҙна буйына диңгеҙҙә һыу инеп, ял итеп ҡайттыҡ. Һыу ингәндә эргәлә генә дельфиндарҙың йөҙөп йөрөгәне һоҡландырҙы. Ә иң оҡшағаны - катерҙа ярҙан 2-3 саҡрым алыҫлыҡҡа диңгеҙгә кереп, уртаһында ҡырҡ метр тәрәнлектә һыу ингәнебеҙ булды.
Төрлө иҫтәлекле урындарға, тәбиғәттең матур урындарына экскурсияларға йөрөнөк. Хозур Кавказ тауҙарының башланған ерен дә күрҙек, ул иҫ киткес матур ине!
Ҡайтышлай Волгоград ҡалаһында туҡтап, Волганың уң ярында урынлашҡан Бөйөк Ватан һуғышына арналған Мамай Ҡурғанында булдыҡ. Бында Һуғыш ваҡытында ҡаты алыштар булған урында “Сталинград һуғышындағы батырҙарға” һәйкәл-ансамбль ҡуйылған. Унда шундай атмосфера, алыҫ дәһшәтле йылдар шаңдауы тетрәндерҙе, күңелем тулды. Мәңгелек ут янында караул алышынған мәлен дә күрҙек. Төрлө урындарҙа иҫтәлеккә фотоға төштөк.
Диңгеҙ күреп, унда һыу инеп, ял итеп ҡайтайыҡ тигән сәфәребеҙ бик оҡшаны. Тормош мәшәҡәттәре бер ваҡытта ла бөтмәй ул. Шуға ла баҙнат итеп сығып китеп, күрмәгән яҡтарҙы күреп ҡайтырға кәрәк. Барлығы биш мең саҡрым юл үттек. Әллә юлда күп тәьҫораттар алғанға, әллә мәңге булмаған ерҙәрҙе күргәнгә, арыманыҡ.
Алдағы йылдарҙа ла һаулыҡ булып, тағы ла күрмәгән ерҙәрҙе күрергә насип булһын ине.
Флүрә Самиҡова.
Олокүл ауылы.