Ябай биография
Николай Боченков 1968 йылдың 3 ноябрендә Александровка ауылында тыуған. 1983 йылда ауыл мәктәбенең һигеҙенсе класын тамамлағандан һуң, техник-технолог белгеслеге буйынса Салауат индустриаль колледжына уҡырға инә. 1988 йылда уны армияға алалар, Байконурҙа хеҙмәт итә. Армиянан һуң 1994 йылдың июлендә ул Салауат ҡалаһының эске эштәр бүлегенә эшкә керә. Махсус белем алғандан һуң уны милиция участкаһы инспекторы итеп билдәләйҙәр.
Хеҙмәттәштәре иҫкә алалар
Игорь Габиев, ул ваҡытта әле милицияның кесе лейтенанты, участка инспекторы, хәҙерге майор:
- Беҙ төрлө участкаларҙа эшләнек, йыш ҡына бер-беребеҙгә ярҙам иттек, дуҫ булдыҡ. Участка инспекторҙарының йөҙҙә бер бурысы бар: хоҡуҡ боҙоуҙарҙы профилактикалау менән шөғөлләнеү, имен булмаған ғаиләләргә йөрөү, күҙәтеү аҫтындағы- ларҙы тикшереү, енәйәтселәрҙе эҙләү хеҙмәткәрҙәренә енәйәттәрҙе асырға ярҙам итеү, наркомандарҙы асыҡлау һәм башҡалар. Николай ябай ауыл егете, аралашыусан, ярҙамсыл, яҡшы дуҫ булды. Ғаилә ҡорорға, Өфө юридик институтының ситтән тороп уҡыу бүлегенә уҡырға инергә планлаштыра ине. Ул вафат булғас, минең өсөн был шок булды. Табутты, уның кәүҙәһе менән, уның тыуған ауылына алып барып, шунда күмдек...
- Ул ваҡыт уҙған быуаттың туҡһанынсы йылдары ине. Ойошҡан енәйәтсел төркөмдәрҙең хакимлыҡ иткән сағы. Бөтөн илгә Екатеринбургтан “Уралмашсылар”, Ҡазандан “Һаҙи таҡташ” группировкаһы һәм башҡалар билдәле ине. Салауат ҡалаһын да бындай бәлә-ҡаза ситләтеп уҙманы. Енәйәт төркөмдәренең исемдәре билдәле, улар ҡала халҡы ҡолағында булды. Улар төрлө өлкәләрҙе бүлештеләр, талау, янап ҡурҡытыу менән шөғөлләнделәр, буйһонмаусыларҙы, шул иҫәптән үҙ криминаль донъяһы вәкилдәрен дә - бысаҡтар, утлы ҡорал һәм хатта шартлатҡыс ҡулланыуҙы ла эшкә ектеләр. Танылған “Хозтауарсылар” тибындағы йәштәр төркөмдәре лә бар ине, унда нигеҙҙә бәлиғ булмаған, төрлө уҡыу йорттарының уҡыусылары кергән ине.
Алексей Саргаев һүҙҙәренсә, милиция майоры, ул ваҡытта Салауат эске эштәр идараһының өлкән тикшереүсеһе, Боченковты үлтергәнсе туҡмаған ваҡытта, яңы эҙҙәр буйынса ике йәштәр төркөмө вәкилдәрен тотҡарлағандар ине. Ул кисте ул дежур торҙо һәм тикшереүҙе миңә тапшырҙылар. Эш ҡатмарлы һәм ентекле булды. Утыҙ кеше тотҡарланған һәм барыһын да асыҡларға, төп башлап ебәреүселәрҙе айырып күрһәтергә кәрәк ине. Ғәйепләүҙе ул саҡтағы 108-се статья буйынса белдерҙеләр: аңлы рәүештә ауыр тән йәрәхәттәре ҡулланыу. Һорауҙар күп булды, барыһын да бөртөкләп йыйҙылар, дәлилләү базаһын киңәйттеләр. Унан һуң прокуратура был эште кире тикшереүгә ҡайтара, һәм судҡа ул тиҙ генә эләкмәй әле.
- Минең ҡулда хөкөм ҡарары күсермәһе. Ултырыш енәйәт ҡылғандан һуң, йыл ярым уҙғас ҡына, 1998 йылдың 26 мартында ғына уҙҙы. Эште 1996 йылдың 23 сентябрендә енәйәт ҡылған бер төркөм кешеләрҙе ғәйепләү буйынса ҡаранылар, - тип уртаҡлаша Алексей Федорович.
23 сентябрҙә, киске сәғәт туғыҙ тирәһендә нимә булды?
Алексей Саргаев өҙөмтә килтерә: “Орфеевлылар”, йәштәрҙең формаль булмаған төркөмө ағзалары (яҡынса 35-45 кеше) алдан килешеп, нефть институты филиалы янында дошман мөнәсәбәттәрендә булған “Кастра” төркөмөнөң ағзалары менән һуғышыу маҡсатында осрашалар. Уларҙың күбеһе тимер торбалар һәм таяҡтар менән ҡоралланған була. Шунан һуң улар “кастовлылар”ҙы кварталдар буйынса эҙләй башлайҙар. 53 кварталға килеп, төркөм вәкилдәрен күргәс, уларҙы эҙәрлекләйҙәр. Был ваҡытта, милиция участкаһы инспекторы Н.К.Боченков, бәлиғ булмағандар эштәре буйынса инспектор һәм милицияға булышлыҡ итеүҙең эшсе отряды ағзаһы менән әлеге административ участка буйынса патрулдә булалар.
Һуғышсан ҡарашлы йәштәр төркөмөн күреп, һуғышыуҙы булдырмау маҡсаты менән Боченков улар араһына баҫа. Әммә (алға таба ғәйепләнеүселәрҙең фамилиялары һанап үтелә) хулиганлыҡ ниәтенән уға һөжүм итәләр, аяҡтан йығалар һәм уны туҡмайҙар. Шул уҡ ваҡытта аяҡтары менән типкеләп, үҙҙәре менән алып килгән предметтар менән һуғалар. Туҡмау һөҙөмтәһендә йәшәү өсөн ҡурҡыныс булған баш йәрәхәте, баш һөйәге нигеҙенең күп ҡырлы һыныуы, баш мейеһенең уң яҡ өлөшөн емереү кеүек йәрәхәттәр алынған була. Юғарыла күрһәтелгән тән йәрәхәттәренән тыш, Боченковҡа шул уҡ заттар тарафынан баштың артҡы һәм битенә йәрәхәттәр килтерелгән була. Боченковтың үлеме баш мейеһенең өлөшсә зыян алыуҙан һәм баш мейеһенең йәрәхәтенән була.
Эш материалдарынан күренеүенсә, ярһыған йәштәр уны ҡаты туҡмаған. Ғәйепләнеүселәр эскәмйәһенә кем эләкте һуң? Енәйәт ҡылынған ваҡытта барлыҡ бишеһенә лә ун етешәр йәш булған, икеһе элек хөкөм ителгән, абруйлы колледждың ике студенты, тағы икеһе – училище студенттары һәм бер генә кеше бер ерҙә лә эшләмәгән һәм уҡымаған. Суд уларҙы икенән алып һигеҙ йылға тиклем иркенән мәхрүм итте. Кемдер үҙ ғәйебен таныманы, кемдер - өлөшләтә генә. Улар күптән инде иректә һәм ҡылғандары тураһында үкенмәйҙәр булһа кәрәк.
Эске эштәр министрлығының күрһәтмәһендә әйтелгәнсә: “Талаптарға хулигандар яуап бирмәне. Хоҡуҡ боҙоуҙарға юл ҡуймау маҡсатынан, Боченков ярһыған төркөмгә ташланды һәм массакүләм тәртипһеҙлекте булдырмау өсөн барлыҡ кәрәкле сараларҙы ҡабул итте. Кесе лейтенант, һөнәри бурыстарына тоғро ҡалып, батырлыҡ һәм фиҙаҡәрлек күрһәтеп һәләк булды. Үҙ тормошон аямайынса башҡа кешеләрҙең үлемен булдырмай ҡалды”. Хеҙмәт бурыстарын үтәгәндә күрһәткән батырлығы һәм ҡыйыулығы өсөн 1998 йылдың 4 мартында Рәсәй Федерацияһы Президенты Указы менән милицияның кесе лейтенанты Николай Кузьмич Боченков үлгәндән һуң Батырлыҡ ордены менән бүләкләнде, ул тантаналы шарттарҙа, уның һеңлеһе Валентина Губановаға тапшырылды. Уның портреты РФ Эске эштәр министрлығының Салауат ҡалаһы буйынса бүлеге музейында эленеп тора, исеме территорияһындағы мемориаль диуарға индерелгән һәм, ниһайәт, Боченков исеме менән Салауат ҡалаһының бер урамы аталған.
Һеңлеһенең хәтирәләре
Салауат Эске эштәр идараһының миграция мәсьәләләре бүлеге хеҙмәткәрҙәре ярҙамында (иҫке паспорт бүлеге буйынса) Николайҙың һеңлеһе Валентина Кузьминичнаның адресын табып, уның менән осраша алдыҡ.
- Ата-әсәйебеҙҙең алты балаһы бар ине – биш улы һәм мин. Хәҙер инде туғандарымдың береһе лә иҫән түгел, мин үҙем генә ҡалдым. Николай яҡшы уҡыны, алты йәштән мәктәпкә уҡырға барҙы. Салауат ҡалаһына килеп, колледжда уҡыны, беҙҙә йәшәне. Диплом алғас, юллама буйынса Киров ҡалаһына ебәрҙеләр, унан армияға алдылар. Унда Коля хеҙмәт итергә ҡалған ине, ләкин әсәйебеҙ ауырып киткәс, тыуған яҡҡа ҡайтты. Милицияға хеҙмәт итергә керҙе, тиҙҙән уға эштән фатир бирҙеләр. Унан дүрт йәшкә генә өлкәнерәк булһам да, Коля минең өсөн улым кеүек ине. Аҡыллы, бөтә эшкә лә уңған, ғәҙел кеше, ялғанлыҡты яратманы. Әсәйебеҙ үлгәнгә ярты йыл үтеп иҫкә алырға барғас, мин әйтәм: “Коля, беҙгә ҡунырға кил”. Ә ул: “Иртәгә килермен, минең сәсемде киҫерһең”, - тип яуап бирҙе. Был беҙҙең һуңғы осрашыуыбыҙ ине.
Икенсе кисте беҙҙең янға уның дуҫы, шулай уҡ участковый Игорь Габиев килде. Миңә бер һүҙ ҙә әйтмәне, иремде саҡыртып, уға барыһын да аңлатып бирҙе. Коля дауаханала үлгән. Уны ауылға алып китер алдынан оҙатырға күп халыҡ килгән ине, хатта һаубуллашыр өсөн уның участогынан бер әбей ҙә килде, - тип һөйләй Валентина Кузьминична.
Яҡташтарының иҫтәлектәренән
Яҡташыбыҙҙың ҡәбере Александровка ауылында урынлашҡан. Ауыл халҡы Николай Боченковты йылы һүҙҙәр менән генә иҫкә ала. Улар Николай Кузмичты бала саҡтан уҡ аҡыллы, яҡшы егет булды, тиҙәр. Хатта йәштәштәре кәмһеткәндә лә - ул бер ҡасан да иламаны, киреһенсә, көлә генә ине. Бәлки, ауыртыу һиҙмәгәндер, йәки үҙенең йомшаҡлығын күрһәтмәҫкә тырышҡандыр. Әлеге ваҡытта апайы аҙна һайын ауылға ҡайта. Ул туғандарының ҡәберҙәрен ҡарай. Уларҙың ҡәбере һәр ваҡыт йыйыш- тырылған, таҙа. Әсәһе менән ағайҙары йәнәшә күмелгәндәр.
Герой хөрмәтенә урам
Салауат милицияһының 28 йәшлек хеҙмәткәре һәләк булған көндән сирек быуат уҙҙы. Салауат ҡалаһының, “Көнбайыш” микрорайонындағы урам, енәйәтселәрҙе тотҡарлағанда һәләк булған, милицияның кесе лейтенанты һәм үлгәндән һуң Батырлыҡ ордены менән бүләкләнгән Николай Боченков исемен йөрөтәсәк.
Зәбир Исламов,
“Һайлау” гәзите хәбәрсеһе.
(Салауат ҡалаһы).