Мунсанан башланған янғын ҙур фажиғәгә килтерҙе...

Борай районының Абдулла ауылында иртәнге сәғәт биштә мунса янып китә. Ут тиҙ арала бүрәнә йортҡа һәм гаражға күскән, шулай уҡ “Лада Веста” автомобиле янған.

Рәсәй Ғәҙәттән тыш хәлдәр министрлығының янғын һүндереүселәре ирекмәндәр менән бергә 72 квадрат метр майҙанда янғынды һүндергән.

Үкенескә күрә, янғынды һүндергән саҡта 20 йәшлек ҡыҙҙың кәүҙәһе табылған. Тәне бешкән һәм шок хәлендә 24 йәшлек ир дауаханаға оҙатылған, тип хәбәр иттеләр республика Ғәҙәттән тыш хәлдәр министрлығының матбуғат хеҙмәтенән.

Янғын сәбәбе асыҡлана. Урында Рәсәй Ғәҙәттән тыш хәлдәр министрлығының тәфтиш-оператив төркөмө һәм тәүтикшереүсе эшләй.

“Хөрмәтле граждандар, янғын хәүефһеҙлеге ҡағиҙәләрен үтәгеҙ:

- тик төҙөк газ ҡорамаларын ғына файҙаланығыҙ;

- газ йәки электр плитаһында бешкән аҙыҡты ҡарауһыҙ ҡалдырмағыҙ;

- янғын тураһында иҫкәртеүсе ҡоролма ҡуйығыҙ. Ул көслө тауыш менән янғын тураһында иҫкәртә.

Фото: МЧС.