Зыяратты кәртәләү өсөн

Унда район башлығының финанс мәсьәләләр буйынса урынбаҫары Илфат Хәмитов, йыйылыш рәйесе – Яңы Ҡы­йышҡы ауыл Советы хакимиәте башлығы Фидан Миңлеғәлиев, секретарь Гөлнара Низамова ҡатнашты. Көн тәртибендә халыҡҡа “Урындағы башланғыстарҙы хуплау” программаһында ҡатнашыу ҡа­ғиҙәләре һәм унда ниндәй проекттарҙы тормошҡа ашырып булыуы тураһында һөйләнеләр. Ауылдың беренсе сираттағы проблемаларын күтәреү, халыҡтың финанс яҡ­тан өлөшләтә ҡатнашыуы, Тө­бәк-Таҙлар ауылы халҡы араһынан инициатив төркөмдө һайлау, шулай уҡ артып ҡалған аҡсаны ҡайҙа тотоноу кеүек мәсьәләләр тикшерелде.
“Урындағы башланғыстар­ҙы хуплау” программаһы кон­курс нигеҙендә биләмәне төҙөкләндереүгә йүнәлтелгән проекттарҙы ғәмәлгә ашырыуға республика бюджетынан субсидиялар бүлеп биреүҙе күҙ уңында тота. Шул уҡ ваҡытта ауыл би­­ләмәләрендә проекттарҙы һайлап алыу һәм ғәмәлгә ашырыу халыҡтың әүҙем ҡатнашлығында үткәрелә. Йәғ­ни ауыл халҡы иң мөһим проб­леманы үҙе билдәләй. Йы­йы­­лышта ауылдың булған проблемаларын күтәреп сыҡ­тылар. Халыҡ был программала ҡатнашыу өсөн һәм “Зыярат кәртәһен капиталь ремонтлау” проектын хуплап тауыш бирҙе.
Ришат Үлмәҫбаев, Ғайсар Үлмәҫбаев, Рим Янбаев, Вла­димир Кузинов, Айрат Йөҙ­лөкбаев составындағы инициатив төркөм төҙөлдө. Проект еңгән осраҡта улар эштәр барышын контролдә тотасаҡ, проектты финанслау яғынан халыҡтан аҡса йыйыу менән шөғөлләнәсәк.
Өҫтөнлөклө бурыстар һайланды. Ә барлыҡ ниәттәр тормошҡа ашһын өсөн бергәләп күп көс һалырға ғына кәрәк.
Гөлсәсәк ӘСӘҘУЛЛИНА.