Бер кем дә, бер нимә лә онотолмаҫ!

Мәктәп уҡыусылары һәм уҡытыусылары илебеҙгә еңеү килтереү өсөн йәнен-тәнен аямаған яҡындарының фо­тоһүрәттәре менән ауыл буйлап «Үлемһеҙ полк» парады менән үткәс, Бөйөк Еңеүҙең 80 йыл­лығы уңайынан әҙерләнгән “Бер кем дә, бер нимә лә лә оно­толмай” тип аталған тантаналы өлөш башланды.

Район хакимиәтенең баш ар­хитекторы – йәшәйеште тәьмин итеү, төҙөлөш һәм архитектура бүлеге начальнигы Артур Айбу­латов сарала ҡатнашыусыларҙы район хакимиәте башлығы Әл­фир Сабиров һәм үҙенең исе­менән Бөйөк байрам менән ҡотланы һәм изге теләктәрен еткерҙе. Һәүәләй ауыл Сове­ты хакимиәте башлығы Тимур Ғәләүетдинов та яҡташтарын Еңеүҙең 80 йыллығы менән тә­брикләгәс, Тыуған илебеҙ ты­ныслығы өсөн төрлө йылдарҙа һәләк булғандарҙың барыһын да хәтергә алыу өсөн бер минутлыҡ тынлыҡ иғлан итте.

Бына, ниһәйәт, таҫмалар киҫелде, аҡ ябыу асылды һәм беҙҙең алға мөһәбәт һәйкәл пәйҙә булды. Ҡунаҡтар, ауыл­даштар бер-бер артлы гөл­ләмәләр һалды һәм уларҙың һәр береһенең йөҙҙәрендә илебеҙгә тыныслыҡ бүләк итеүсе ата-ба­баларыбыҙға бөтмәҫ-төкәнмәҫ рәхмәт билдәләре, әлеге барған һуғыш тиҙерәк бөтһөн тигән теләктәр сағыла ине.

Мәктәп уҡыусылары, мәҙә­ниәт йорто хеҙмәткәрҙәре һәм үҙешмәкәрҙәр әҙерләгән илһөйәрәлек рухындағы йәмле концерт программаһы биҙәне был иҫтәлекле сараны. Һалдат бутҡаһы менән һыйланған саҡта ла тантанала ҡатнашыусылар – тыл һәм хеҙмәт ветерандары, һуғыш осоро балалары үҙҙәрен бер аҙға булһа ла яу ҡырына ба­рып ҡайтҡандай хис иткәндер, моғайын.

Сараны әҙерләүҙә матди ярҙам күрһәткәндәре өсөн Би­шауыл-Уңғар халҡы эшҡыуарҙар Фаилә һәм Рәфил Вәлиәхмәтовтарға, бутҡа менән һыйлаусы Динә Исхаҡова менән Фәимә Хисамоваға оло рәхмәттәрен белдерҙе.

Киләсәк быуын да Вата­ныбыҙ өсөн көрәшкән барлыҡ яҡташтарыбыҙҙы ошолай хөр­мәтләп хәтергә алыр, бер кем дә, бер нимә лә онотолмаҫ, тигән өмөттәр менән таралыштыҡ.

Розалия НАЗАРОВА.

Автор фотолары.