Һәр кем үҙ һорауына яуап тапты

Осрашыуҙа район хакимиәте башлығы Әлфир Сабиров, уның урынбаҫарҙа­ры Гөлнара Иҫәнбаева, Илдар Латипов, Ҡырмыҫҡалы һәм Архангел райондары­ның хәрби комиссары Рөстәм Вәлитов, район мәғариф бүлеге начальнигы Андрей Матвеев, “Ватанды һаҡлаусылар” дәүләт фонды филиалының социаль координаторы Ғәлиә Бикбаева, При­бельский һәм Ҡамышлы ауыл Совет­тары ауыл биләмәләре хакимиәттәре башлыҡтары Наталья Суркова менән Илгиз Бикҡужин һәм шулай уҡ төрлө өл­кәлә эшләүсе район белгестәре, полиция вәкилдәре ҡатнашты.

- Бындай форматтағы осрашыуҙар һәр бер ауыл Советы биләмәһендә уҙға­рыла. Һеҙ бында үҙегеҙҙе ҡыҙыҡһындырған, борсоған һәр бер һорауығыҙға яуап таба алаһығыҙ. Ҡайһы бер проблемала­рығыҙҙы шунда уҡ хәл итергә тырыша­саҡбыҙ, ваҡыт талап ителә торғандарын яҙып алырбыҙ, -тип сәләмләне сарала ҡатнашыусыларҙы Әлфир Фәрхәт улы.

Рөстәм Урал улы үҙ сиратында махсус хәрби операцияла ҡатнашыусыларҙың балалары юғары хәрби уҡыу йорттта­рында белем алыу мөмкинлегенә эйә бу­лыуы хаҡында һөйләне.

Артабан район белгестәренең һәр бе­реһе үҙ өлкәһенә ҡағылған ярҙам сарала­ры тураһында тулы мәғлүмәт бирҙе.

Осрашыуҙа шулай уҡ хәҙерге көндә барыбыҙҙы ла ҙур борсоуға һалған мут­лашыусыларға бәйле һорау ҙа күтәрелде. Банк карталарына эйә булған балаларға һәм ололарға сит номерҙан шылтыратыусыларҙың береһенә лә яуап бирмәҫкә кәңәш ителде. Бигерәк тә махсус хәр­би операцияла ҡатнашыусыларға һәм уларҙың ғаилә ағзаларына мутлашыусы­лар төрлө алдаҡ хәбәрҙәр менән шыл­тыратып йонсотоуҙары ла телгә алын­ды һәм барыһына ла һаҡ булырға, һәр мәғлүмәтте тәүҙә тикшерергә кәрәклеге хаҡында белдерелде.

Сығыштарҙан һуң сарала ҡатнашыу­сылар белгестәргә үҙҙәренең һорауҙарын биреп, тулы яуап алды, ә сәй табыны артында Прибельский мәҙәниәт йорто хеҙмәткәрҙәре моңло йырҙарын бүләк итте.