+24 °С
Ямғыр
Новости
23 Апрель 2025, 17:25
Был ысулды донъя хирургтары файҙалана
Был ысул иң замансаһы һәм аҙ йәрәхәттәр ҡалдырғаны тип һанала.
Был ысулды донъя хирургтары файҙалана
Баймаҡ үҙәк район дауаханаһына видеохирургия таяуы килтерелгән. Быйылдан медицина ойошмалары “Оҙайлы һәм әүҙем тормош” милли проекты (национальный проект “Продолжительная и активная жизнь”) бурыстарын тормошҡа ашырыуға ярашлы алып барыла. Ҡорамалдар килгәндән алып 55-тән ашыу әмәлиәт яһалған.
Таяу лапароскопия операциялары өсөн махсус техника һәм ҡорамалдар менән йыһазландырылған. Лапароскопия ысулы тотош донъя хирургтары тарафынан уңышлы файҙалана, сөнки уның ярҙамында пациент та аҙыраҡ йәрәхәтләнә.
- Бындай операциянан һуң пациент тәнендә эҙҙәр ҡалмай тиерлек, өҫтәүенә тиҙерәк йүнәлә. Был ысул иң замансаһы һәм аҙ йәрәхәттәр ҡалдырғаны тип һанала, - тип белдергән Баймаҡ үҙәк район дауаханаһы баш табибы Илшат Рысҡужин.
Әйткәндәй, 2025 йылда Башҡортостанда, “Башҡортостан Республикаһы һаулыҡ һаҡлауҙың беренсел звеноһын модернизациялау” төбәк программаһы (региональная программа “Модернизация первичного звена Республики Башкортостан”) маҡсаттарын тормошҡа ашырыуға ярашлы, 4,5 меңдән ашыу ҡорамал, 99 транспорт сараһы һатып алыу, 134 берәмек модулле конструкцияны һатып алыу һәм ҡуйыу планлаштырылған.
Сығанаҡ, фото: БР Һаулыҡ һаҡлау министрлығы.
