Баймаҡ дауаханаһына – яңы ҡорамал

Баймаҡ ҡала дауаханаһы, ”Оҙайлы һәм әүҙем тормош” милли проектына ярашлы, яңы ҡорамал – видеохирургик таяу алды. Яңы ҡорамал лапароскопик операциялар яһау өсөн тәғәйенләнгән. Уның ярҙамында табиптар илленән ашыу аҙ тишемле әмәлиәт яһай алды.

– Бындай операциянан һуң пациент тәнендә йөйҙәр ҡалмай тиерлек. Ауырыу тиҙерәк һауыға. Был процедура пациент өсөн заманса булыуы һәм аҙ йәрәхәт ҡалдырыуы менән әһәмиәтле, – тине Баймаҡ дауаханаһының баш табибы Илшат Рыҫҡужин.

“Оҙайлы һәм әүҙем тормош” милли проекты ( нацпроект “Продолжительная и активная жизнь”) “Һаулыҡ һаҡлау” милли проектын һәм элекке ҙур ҡоласлы “Демография” проектының ҡайһы бер йүнәлештәрен артабан үҫтерәсәк. Тәү сиратта ярҙам сараларын ғүмер оҙайлығы илдәге уртаса күрһәткестән артта ҡалған төбәктәр һәм ауылдар аласаҡ. Милли проект һаулыҡ һаҡлауҙың тәүге звеноһын артабан яңыртыуға йүнәлтелгән, йөрәк-ҡан тамырҙары, онкология һәм диабет сирҙәре менән көрәш буйынса федераль программалар ҙа дауам итәсәк.

Тап ошо мөһим милли проект 2030 йылға көтөлгән ғүмер оҙайлығын 78 йәшкә (артабан 80 йәшкә) тиклем еткереүҙе күҙ уңында тота. Иҫегеҙгә төшөрәбеҙ, яңыртылған милли проекттар Рәсәй Президенты Владимир Путин ҡарары буйынса 2025 йылдың 1 ғинуарынан тормошҡа ашырыла.

Фото: Һаулыҡ һаҡлау министрлығының матбуғат хеҙмәте.

https://bashgazet.ru/articles/milli-proekttar/2025-04-22/bayma-dauahana-yna-ya-y-oramal-4207816