Юбилей миҙалдары тапшырылды

Ошо көндәрҙә Иҫке Бәпес ауылы биләмәһе хакимиә­те башлығы Азамат Ғәйфул­лин изге теләктәренә ҡушып, яҡташтарыбыҙға – хеҙмәт уҙа­мандары, тыл хеҙмәтсәндәре Рауил Хәлитовҡа, Ҡасим Яҡу­повҡа, Рабиға Хәбибуллинаға, Наҙия Хәсәноваға “Бөйөк Ватан һуғышында Еңеүҙең 80 йыллығы” юбилей миҙалда­рын һәм бүләктәр тапшырҙы. Башҡортостан Республикаһы­ның атҡаҙанған мәҙәниәт хеҙмәткәре Азамат Муса улы­ның өҙҙөрөп баянда уйнауы­на ҡушылып, беҙ, Иҫке Бәпес ауылы мәҙәниәт йорто хеҙмәт­кәрҙәре, хөрмәтле ветерандарға хәрби йырҙар ҙа бүләк иттек. Улар үҙҙәре лә беҙгә ҡушылып йырланы һәм оло хөрмәт күрһә­теүселәргә ихлас рәхмәттәрен белдерҙе.

- Аттар егеп, Ҡарлыман ауылы ағайҙарын 1941 йылдың сентябрендә Ҡарлыман станци­яһына һуғышҡа оҙаттылар. Ат­тар күп булғас, беҙ – ун йәшлек балалар ҙа ултырып барҙыҡ. Бер кеше иламаны, барыһы ла йырлап-бейенеләр. Ғаиләлә иң оло бала булараҡ, миңә үҙем­дең ике туған ағайымдарҙы ла һуғышҡа оҙатырға тура кил­де. Һуғыш йылдарында беҙҙең кеүек балаларҙың барыһы ла йәй буйы баҫыуға иген утарға йөрөнө. Ныҡ ауыр эштәрҙе ба­лаларға ҡушырға тырышманы­лар, - тигән хәтирәләре менән бүлеште Наҙия Хәсәнова. Яҡташтарыбыҙҙың барыһына ла тыныс күк йөҙө, иҫәнлек- һаулыҡ һәм оҙон ғүмер теләй­беҙ.

Гөлназ ҒАФФАРОВА. Иҫке Бәпес ауылы мәҙәниәт йортоноң мәҙәни ойоштороусыһы.