Система эште еңелләштерәсәк

Башҡортостандың Урман хужалығы министрлығында Урман комплексының федераль дәүләт мәғлүмәт системаһын ғәмәлгә индереү мәсьәләләре тикшерелде. Ул 2025 йылдың 1 ғинуарынан тулыһынса эшләй башлай.

Ул власть органдары, урман участкаларын ҡуртымға алыусылар, башҡа урман менән файҙаланыусылар һәм граждандар өсөн берҙәм мәғлүмәт майҙаны буласаҡ. Был урман хужалығына ҡағылышлы берҙән-бер үҙгәреш түгел. 2025 йылдан “Экология” милли проекты “Экологик именлек” милли проекты булараҡ дауам итә. Төбәктең урман байлығын һаҡлау һәм арттырыу, һис шикһеҙ, уның төп йүнәлештәренең береһе булып ҡаласаҡ.

– Төбәктең Урман хужалығы министрлығы белгестәре системаға мәғлүмәттәрҙе туплай. Улар дүрт блокка бүленгән: һуңғы бер нисә йылда бирелгән урман декларациялары тураһында мәғлүмәттәр; төҙөлгән ҡуртым килешеүҙәре тураһында мәғлүмәттәр; урман фонды буйынса Берҙәм дәүләт күсемһеҙ милек реестрынан күсермәләр һәм урман ҡоролошо материалдары. Бөгөн системаға бөтә урман хужалыҡтары тураһында мәғлүмәт һалынған, ә улар беҙҙә - 31, 30 меңдән ашыу квартал һәм 780 мең бүлем хаҡында мәғлүмәт, - тип аңлатты республиканың урман хужалығы министры Марат Шәрәфетдинов. – Яңы система рөхсәтһеҙ ҡырҡыуҙарға юл ҡуймаҫҡа һәм ағасты әҙерләүҙән алып һатыуға тиклемге бөтә этаптарҙа иҫәпкә алыуҙы тәьмин итергә, шулай уҡ дәүләт структуралары һәм бизнес араһында үҙ-ара эш итеүҙе ҡулайлаштырырға ярҙам итер тип көтәбеҙ.

Билдәле булыуынса, “Экология” (национальный проект “Экология”) милли проекты Рәсәй Президенты Владимир Путиндың май указы менән булдырылды.

Фото: Урман хужалығы министрлығы.

https://bashgazet.ru/articles/milli-proekttar/2024-12-23/sistema-eshte-e-ell-shter-s-k-4063587