Ҡыйғылар бергәләп саңғы шыуҙы

Ҡыйғы районының Үрге Ҡыйғы ауылында саңғы ярыштары үткәрелде. Был спорт сараһы Башҡортостан Республикаһында махсус хәрби операцияла ҡатнашыусыларға һәм уларҙың ғаилә ағзаларына ярҙам йылына – Ватанды һаҡлаусылар йылына арналды.

Ярышта ҡатнашыусыларҙы Ҡыйғы районы хакимиәтенең йәштәр сәйәсәте, спорт һәм туризм буйынса комитет рәйесе Филүс Ҡазыханов сәләмләне. Тәбиғәт тә спорт һөйөүселәргә яҡшы һөҙөмтәләргә өлгәшеүгә булышлыҡ итте: һауа торошо бик яҡшы торҙо.

Бер километр арауыҡта 2015 йылғы ҡыҙҙар араһында беренсе урынды – Амалия Исхаҡова, малайҙар араһында Камил Ҡотошов яуланы. Ошо уҡ арауыҡҡа ярыштарҙа 2013-2014 йылғы ҡыҙҙар араһында – Алена Сәхәүетдинова, малайҙар араһында Артем Усманов беренсе урынға сыҡты. Ике километр арауыҡта 2011-2012 йылғылар араһында беренсе урында – Айгизә Мирсаяпова, малайҙар араһында Рафаэль Фәрхиуллин булды. Ошо уҡ арауыҡта 2009-2010 йылғылар араһында ҡыҙҙар араһында – Илмира Ғайнановаға, малайҙар араһында Юлай Ҡотошовҡа тиңдәр юҡ ине.

17 – 29 йәшлек гүзәл зат вәкилдәре араһында - Диана Шәрипова, 30 – 39 йәшлек ир-егеттәр араһында Леонид Ғәниев иң етеҙе булып сыҡты. 50 – 59 йәшлек ирҙәр араһында – Рауил Сәхәүетдинов, 60-тан олораҡ көслө зат вәкилдәре араһында Нуриман Фәтихов финишҡа беренсе булып килде.

Барлыҡ еңеүселәр һәм призерҙар грамоталар, миҙалдар һәм киләһе старттарға яңы көс-дәрт алды.

Был спорт объекттарының барлыҡҡа килеүе Рәсәй Президенты Владимир Путиндың “май” указдарына ярашлы барлыҡҡа килгән “Оҙайлы һәм әүҙем тормош” милли проекты (национальный проект “Продолжительная и активная жизнь”) бурыстарын тормошҡа ашырыуға булышлыҡ итә.

Сығанаҡ, фото: Ҡыйғы районы хакимиәте.