Радий Хәбиров Башҡортостан колледждарында ишетеү һәләттәре сикләнгәндәр өсөн махсуслашҡан төркөмдәр булдырырға ҡушты

Бөгөн Республика менән идара итеү үҙәгендә үткән хөкүмәт оператив кәңәшмәһендә төбәктең ғаилә, хеҙмәт һәм халыҡты социаль яҡлау министры Ленара Иванова ошо көндәрҙә Өфөлә үткән сара - ишетеү һәләте боҙолғандар араһында “DeafSkills-2022” II һөнәри оҫталыҡ милли чемпионаты йомғаҡтары менән уртаҡлашты. Уның һүҙҙәре буйынса, Башҡортостан командаһы икенсе дөйөм команда урынына лайыҡ булған. Беҙҙекеләр бынан тыш 2 алтын, 5 көмөш һәм 3 бронза миҙал алған,

«Был бик мөһим. Мин чемпионатты асыуҙа ҡатнаштым, беҙ ул егет-ҡыҙҙар, федерация вәкилдәре менән аралаштыҡ. Был бик позитив кешеләр, ишетмәһәләр ҙә, проблемалары булһа ла, уларға ҡарап энергия алырға була», — тине республика етәксеһе.

Радий Хәбиров республиканың мәғариф министрына колледждарҙа махсуслашҡан төркөмдәр булдырырға ҡушып, бындай балалар урта һөнәри белем алһын тине.

«Иң тәүҙә беҙгә сурдотәржемәселәр һәм ишетеү һәләттәре сикләнгәндәргә махсус программалы 3-5 колледж кәрәк. Беҙгә улар эшләйәсәк һөнәрҙәрҙе иғтибарлап ҡарарға һәм улар буйынса уҡыу йорттарында сурдобелгестәр эшләүен тәьмин итеү бурысы тора», — тине Радий Хәбиров.

https://www.bashinform.ru/news/social/2022-10-24/na-nih-smotrish-i-zaryazhaeshsya-energiey-radiy-habirov-o-finale-chempionate-deafskills-v-ufe-3000981