Ауырыуҙы дауалауға ҡарағанда, уны алдан киҫәтеү яҡшыраҡ тиҙәр. Ҡырмыҫҡалы район үҙәк дауаханаһы поликлиникаһында бының өсөн яңы мөмкинлектәр барлыҡҡа килде – эзофагогастродуоденоскопия (ЭГДС)үткәреү өсөн аппарат ҡайтты. Был заманса һәм юғары аныҡлы ҡорамалды “Һаулыҡ һаҡлау” милли проектының “Беренсел звеноны модернизациялау” программаһын тормошҡа ашырыу сиктәрендә алыу мөмкин булды.
Эзофагогастродуоденоскопия – ул аш юлының, ашҡаҙандың һәм эсәктең эске өлөшөн һәм лайлалы тиресәһен ҡарарға мөмкин булған эндоскопик тикшереү. Тикшереүҙе квалификациялы табип-эндоскопист Әлфиә Әхмәҙуллина үткәрәсәк. Был аппарат ярҙамында диагностика сифаты ғына яҡшырып ҡалмай, пациенттар өсөн уны үтеү күпкә еңелерәк буласаҡ, ти Ҡырмыҫҡалы район үҙәк дауаханаһы белгестәре һәм улар матди-техник базаны яҡшыртыу һәм халыҡҡа медицина ярҙамы күрһәтеү кимәлен күтәрергә ярҙам иткән проектҡа оло рәхмәт белдерә.