Ҡыҙы яңы мөхиткә нисек өйрәнеп китер, тип әсәһе генә бер аҙ борсолоп тора. Был йәһәттән беҙҙең файҙалы кәңәштәр уға ла, башҡа беренсе класҡа барыусыларҙың яҡындарына ла ярҙам итер.
1. Күңелле, мажараларға бай мәктәп йылдарын хәтергә төшөрөп, балағыҙға ошо осорҙағы матур хәтирәләр, дуҫтарығыҙ хаҡында һөйләп, бергәләп уҡыусы саҡтағы фотоһүрәттәрҙе ҡарап сығыу һәйбәт буласаҡ. Был иһә бәләкәскә үҙен ышаныслыраҡ тойорға ярҙам итер, уҡырға барыу теләген арттырыр.
2. Юғалып ҡалмау мөмкинлеге биргән мәғлүмәттәрҙе ятлауҙың файҙаһы тейер. Ғәҙәттә, был йәштәге балаларҙан: «Әсәйеңдең исеме кем?» – тип һораһаң, «әсәй», тип яуап ҡайтара. Шуға үҙенең исем-фамилияһын, телефон һанын, йорт адресын, ата-әсәһенең исемдәрен белеү кәрәк. Мәғлүмәтле булыу балаға таныш булмаған хәлдән сығырға ярҙам итәсәк.
3. Балаға үҙ әйберен тәртиптә тоторға өйрәтеү ҙә яҡшы. Алдан уҡ өйҙә уның дәрес әҙерләү урынын әҙерләп ҡуйығыҙ. Үҙен өлкәндәрсә тотһон өсөн, бындағы тәртипкә яуаплы булыуын аңлатыу ҡамасауламаҫ.
4. Мәктәптәге ауырлыҡтар һәм уңышһыҙлыҡтар менән ҡурҡытырға кәрәкмәй. Барыһына ла уҡыу, иҫәпләү еңел генә бирелмәүе лә бар. Етмәһә, был йәштә күптәр бер ерҙә генә ултырырға яратмай. Ҡайһы берәүҙәрҙе иртәнсәк уятыуы ауыр. Шуға баланы «Һине мәктәпкә алмаясаҡтар», «Икеле» ҡуясаҡтар», «Класта көләсәктәр» тип ҡурҡытырға ярамай. Был һүҙҙәрҙе әйтеү һәр ваҡытта уңыш килтермәй, эҙемтәһе аяныслы булыуы ла бар.
5. Балағыҙ өсөн уҡытыусы булырға тырышмағыҙ. Дуҫлыҡ мөнәсәбәттәрен һаҡларға ынтылығыҙ. Ҡайһы бер балалар икенселәр менән аралашҡанда ҡыйынһыныу кисерә, таныш булмаған өлкән кеше алдында юғалып ҡалыуы ихтимал. Балаға ауырлыҡты еңеп сығырға ярҙам итегеҙ. Йорт янындағы майҙансыҡта класташтары өсөн уйын ойоштора һәм үҙегеҙ ҙә ҡатнаша алаһығыҙ. Балаларға ата-әсәйҙәр менән бергә уйнау бик оҡшаясаҡ.
6. Уңышһыҙлыҡты дөрөҫ ҡабул итергә лә өйрәтегеҙ. Уйында еңелеп, дуҫтары менән уйнауҙан баш тартты, ти. Бында һеҙҙең ярҙам талап ителә. Тиҫтерҙәренә тағы бер тапҡыр уйнарға тәҡдим итегеҙ, тик уйын ҡағиҙәләрен үҙгәртегеҙ. Бер генә еңеүсе булһын, ҡалғандары – еңелеүселәр. Уйын барышында һәр кемдең уңышын билдәләгеҙ. Күп еңелгәндәргә лә өмөт биреп, дәртләндерегеҙ.
7. Баланың яҡшы тәртибе — ғаилә мөнәсәбәттәре көҙгөһө. «Рәхмәт», «Ғәфү итегеҙ», «Миңә мөмкинме...» тигән тылсымлы һүҙҙәрҙе мәктәпкә бармаҫ борон уҡ ятлап алһын. Өйҙә балаға бойороҡ, команда биреү ҙә кәңәш ителмәй. Уларҙы яғымлы үтенескә әйләндерергә ҡушыла. Ғәзизегеҙ һеҙҙе мотлаҡ ҡабатлаясаҡ, бар яҡлап та өлгө алырға ла тырышасаҡ.
8. Үҙ-үҙенә ышаныс тойғоһон үҫтерергә ярҙам итегеҙ. Буласаҡ уҡыусыға үҙ ихтыяждарына ҡарата иғтибарлы булырға, өлкәндәргә ваҡытында хәбәр итергә өйрәтегеҙ. Ял иткән ваҡытта ҡайҙалыр тамаҡ ялғарға индегеҙ, ти. Балағыҙға үҙаллы заказ яһарға тәҡдим итегеҙ. Киләһе тапҡыр бөтә ғаилә өсөн быны эшләп ҡараһын. Поликлиникала: «Бәҙрәф ҡайҙа?» – тип һорап өйрәнһен йәки белгескә сиратҡа баҫһын.
9. Ғәҙәти тормошта үҙаллылыҡҡа өйрәтеү ҙә насар булмаҫ. Мәктәптән ҡайтҡас, уҡыу кейемен сисеп, тәғәйен шкафҡа матур итеп элеп ҡуйһын. Бала эште күберәк башҡарған һайын үҙен ҙурыраҡ итеп тоясаҡ.
10. Бала менән аралашҡан һайын файҙалы булырға ынтылығыҙ. Әгәр ул байрам бәлеше бешерергә ярҙам итә икән, уның нимәнән, нисек әҙерләнеүен һөйләмәй ҡалмағыҙ.
Аҙыҡ-түлек универсамдары ла – баланың иғтибарын үҫтереү өсөн бик ҡулай урын. Кәрзингә өс ҡап печенье, бер ҡап май, аҡ батон һәм ҡара икмәк алып килеп һалыуын һорағыҙ. Үтенесегеҙҙе бер тапҡыр әйтегеҙ ҙә башҡаса ҡабатламай тороғоҙ.
Бала төшкө ашҡа өҫтәл әҙерләргә ярҙам итә. Дүрт тәрилкә, уларҙың уң яғына дүрт ҡалаҡ ҡуйырға тәҡдим итегеҙ.
Йоҡларға әҙерләнһә, ҡулын йыуырға, таҫтамалды үҙ урынына элергә, ваннаның утын һүндерергә онотмаһын. Көн һайын бер үк эште ҡабатлаһа, был ғәҙәтенә лә инеп китәсәк.
Урам буйлап йөрөгәндә, магазинда, поликлиникала булғанда баланың иғтибарын унда яҙылған һүҙҙәргә – яҙыуҙарға йүнәлтеп, уларҙың мәғәнәһен аңлатыу кескәй кешене үҫтерергә ярҙам итәсәк. Юлда китеп барғанда осраған ағастарҙы, нисә аҙым атлағанын һанау ҙа ыңғай тәьҫир итәсәк.
Г.Шәйхетдинова