1986 йылдың 26 апреленә ҡаршы төндә Чернобыль атом электр станцияһында шартлау яңғырай. Атмосфераға радиактив матдәләр күтәрелә. Мәғлүмәттәр буйынса, авария эҙемтәләрен бөтөрөүҙә 600 меңдән ашыу кеше ҡатнаша һәм ҙур эштәр башҡара.
Был зарарлы зонала эшләгәндәрҙең хеҙмәте ысын батырлыҡҡа тиң. Араларында яҡташыбыҙ, Алмалыҡ ауылында йәшәүсе Сергей Ткачев та ғүмер буйы Чернобыль хәтирәләрен йөрәгендә йөрөтә.
- 1985 йылдың көҙөндә армия сафына алындым. 1986 йылдың апрелендә, йәғни, авариянан һуң иртүк беҙҙе тревога менән уяттылар ҙа вертолеттарға ултыртып, Чернобылгә осорҙолар. Барып еткәс кенә фажиғә тураһында аңлатып, ни өсөн килгәнебеҙҙе әйттеләр. Радиацияның зарарлы булыуын иҫкәртеп, артыҡ нимәгә тотонмаҫҡа ҡушылды, үҫеп ултырған емештәрҙе ашау тыйылды. Шулай ҙа килеп етеү менән ҡайһы берәүҙәр ағастарҙағы алмаларҙы рәхәтләнеп ашарға өлгөргәйне инде... Беҙҙең һәр беребеҙгә дозометр таҡтылар. Ул радиациялағы урында тауыш бирә һәм күпме рентген алғанды һанай. Беҙ тәүҙә урындағы халыҡты эвакуациялау эштәрендә ҡатнаштыҡ, артабан ауылдарҙы мародерлыҡтан һаҡланыҡ. Шунан вертолеттарҙы дезинфекциялай инек. Махсус кейемдәрҙә, респираторҙар кейеп йөрөнөк. Көнөнә 4-5 сәғәт эшләргә тура килде. Ике айҙан һуң беҙҙе госпиталдәргә ебәрҙеләр, шунан 10 көнгә ялға ҡайтарҙылар. Артабан үҙебеҙҙең часта хеҙмәтте дауам иттек, - тип һөйләне Сергей Владимирович.
Сергей Ткачевҡа ике армия юлын үтергә тура килә, тиһәң дә була. Ысын һалдат мәктәбен үткән ир һаулығына һәм башҡа нимәләргә зарланмай. Ул Чернобылдәге хеҙмәтен, ил ҡушҡас, приказ булғас, шулай кәрәк булған, тине. Үҙе әйтмәһә лә, ҡатыны һүҙҙәре буйынса Чернобылдәге зарарланыу һаулығына ныҡ тәьҫир иткән.
Чернобылсе ЧЭС-тағы күрһәткән ҡаһарманлығы өсөн күп миҙалдар менән бүләкләнә, улар араһында “Ватан алдындағы хеҙмәттәре өсөн” II дәрәжәләге миҙал-орден да бар.
Иңенә ҙур һынау төшкән Сергей Ткачев тормошта ла бирешмәй, үҙ урынын таба: теләгән ерендә механизатор-водитель һөнәре буйынса эшләй, ғаилә ҡора, ҡатыны Лена Ивановна менән балалар үҫтерә, хәҙер инде олатай булыу бәхетен дә кисерә.
“Бындай фажиғәләр башҡа ҡабатланмаһын һәм донъялар имен булһын!”, - тигән теләктә ир-уҙаман.
Фәниә Сәлимгәрәева.