Әҙәби кисә күңелдәргә илһам өҫтәне

Риф Йөҙлөкбаев етәклә­гән был берләшмәнең маҡ­саты – күңелдәрендә әҙәби ижадҡа ынтылышы булғандарға теләктәшлек белдереү, артабан да һәләттәрен үҫтерергә бу­лышыу, яңы һәләттәрҙе йәлеп итеү. Маҡсаттарҙы тормошҡа ашырыу уңайынан берләш­мә ағзалары ҡатнашлығында әленән-әле ауыл халҡы, мәк­тәп уҡыусылары менән матур әҙәби осрашыуҙар үтеп тора. Традицияға әйләнгән ошон­дай йәнле сараларҙы халыҡ яратып ҡабул итә. Быны Иҫке Шәрәй мәктәбендә үткән әҙә­би кисә лә раҫланы. Бөйөк Ватан һуғышында Еңеүҙең 80 йыллығына арналған сарала исемдәре хәҙер инде респу­блика кимәлендә билдәле Риф Йөҙлөкбаев, Фәрғәт Ҡотлоба­ев, Фирүзә Абдуллина, Таһир Вилданов кеүек әҙиптәр менән бер рәттән әҙәбиәт майҙанында инде ныҡлы ғына урын тотҡан, үҙ һүҙҙәре булған Әлиә Рәхимо­ва, Ғәлимә Тимерғазина, Динә Мөлкаманова, Зөлфиә Әсфән­дийәрова, Гөлнара Иҫәнғолова, Фәһимә Абдрафиҡова, Мәү­лиҙә Тажетдинова, Менәүәрә Ишҡаринаның сығыштарын та­машасылар яратып ҡабул итте.

Шиғри һүҙҙең мәктәп уҡы­усылары, Аҡташ ауылы мәҙә­ниәт йорто һәүәҫкәрҙәре башҡарыуындағы йырҙар, бей­еүҙәр менән аралашып барыуы тамашаға тағы ла йәм өҫтәне. Шулай уҡ кисәнең уңышында тамаша сценарийын эшләп, үҙе үк алып барған Мәүлиҙә Тажет­динованың да өлөшө бик ҙур. Әҙәби кисәнән тамашасылар ҙа, берләшмә ағзалары үҙҙәре лә ҡәнәғәт булып таралышты.

Рим ИСХАҠОВ.

Бишауыл-Уңғар ауылы.