“Редакцияла эшләгән йылдарым - ғүмеремдең иң күңелле миҙгеле”, - ти Галина Хәбирова

- Бәләкәйҙән уҡытыусы бу­лырға хыялландым, бик күп китаптар һәм гәзиттәр уҡый инем. Ләкин биш йыл уҡырға кәрәк. Ә минең тиҙерәк аҡса эшләгем килде. Шуға 1-се һанлы полиграфистар училищеһына документтарымды тапшырҙым. Бын­да уҡыу оҡшай ине, - тип һүҙ башланы Галина Евгеньевна.
Эшкә ул Ҡырмыҫҡалы типо­графияһына ҡайта. Ул ваҡытта уның директоры Сәлихов Ғаяз Вилдан улы уны йылы ҡабул итә.
Коллектив тормошона ҡыҙ бик тиҙ инеп китә һәм уның айырылғыһыҙ өлөшөнә әйләнә.
- Типография ике ҡатлы ағас бинала урынлашҡан ине. Эш шарттары ла еңелдән түгел, ҡо­ролмалар иҫке. Көнө буйы аяғү­рә баҫып эшләргә тура килде, ултырып торорға ваҡыт та юҡ. Бинаның яртыһын хәреф йыйыу цехы биләһә, икенсе өлөшөндә гәзит баҫыу машинаһы урын­лашҡан, эшләгәндә ул ҡаты геү­ләй ине. Гәзиттең һәр битен ба­ҫыу өсөн машина янына ауырлығы 25 килограмға еткән гранкалар ҙа күтәреп килә инек. Был ваҡытта үтә лә һаҡ булырға кәрәк. Хәрефтәр сәселһә (һирәк булһа ла, булғылай ине), типография эшселәренә һәм редакция хеҙмәткәрҙәренә төнө бу­­йына етерлек эш була, сөнки гәзит сығарыуҙы бер нисек тә өҙөргә ярамай. Ул көндәрҙә төнгә тиклем тотҡарлана инек, - ти Галина, һүҙен дауам итеп.
Редакцияға заманса компью­тер­ҙар һатып алынғандан һуң ғына гәзитте офсет ысулы менән баҫа башлайҙар. Текстар ком­пьютерҙа йыйыла, верстка яһа­ла, компьютерҙа төҙәтелә. Гә­зиттәр әҙерләнеп бөткәс, пленка алына һәм уны типографияға төшөрәләр.
- Беҙ уларҙы тикшереп сыға­быҙ, хаталары булһа, төҙәтәбеҙ. Барыһы ла тәртипкә килтерел­гәс, гәзит баҫа торған станокты ҡабыҙып, баҫа башлайбыҙ. Бер минут та тик торған булманы. Гәзит аҙнаһына өс тапҡыр сыға. Рус телендәге гәзиттең тиражы 5-6 мең булһа, татар телендәгеһе 4800-гә тиклем етә ине. Һуңы­нан район баҫмаһына башҡорт те­лен­дәге гәзит тә ҡушылды. Ул ғына ла түгел, бланктар, брошюралар һәм китаптар ҙа баҫ­тыр­ҙыҡ. Станок иҫке, ул йыш ҡына ватыла. Уны көйләй-көйләй ба­ҫып бөтөргәнсе ваҡыт таңға ауыша ине. Эш еңелдән булмаһа ла, ауырлығы һиҙелмәне, сөнки коллективыбыҙ бик татыу булды. Бер-беребеҙгә ярҙамлашып, бел­мәгәнде өйрәтеп эшләнек. Хеҙ­мәттәштәремдән дә, етәк­­се­­ләр­ҙән дә уңдым. Ул да ғына түгел, ял­дарҙы, байрам­дар­ҙы ла бер­гә­ләшеп үткәрә инек. Йәй көнө сөгөлдөр утарға, көҙөн уларҙы сығарырға йөрөнөк. Бар эштәр ҙә күңелле итеп, уйнап-көлөп үтә ине. Буш ваҡыттарҙа тәбиғәт ҡосағына сығып ял итеүҙәр, йәй көнө бергә еләк, бәшмәк йы­йыр­ға йөрөүҙәребеҙ – береһе лә онотолорлоҡ түгел. Әле булһа гәзит баҫыусылар Га­ля Магомедова, Валя Мостаева, хәреф йыйыусы Динә Саяпова, Мәҙинә Латипова, версткала Фи­дая Саттарова, линотипистка Венера Мо­ратова, Сирена Саттарова, ма­шина көйләүсе Хәмзә Магомедов, Фәғилә Фәйзуллина ме­нән эшләгән йылдарымды һа­ғы­нып иҫкә алам. Мөхәррир Миҙ­хәт Рәжәпов, уның урын­ба­ҫа­ры Эльза Саттарова, яуаплы секретарь Сания Яфаева, корректор Фариҡа Мөхәмәтғә­ли­на­ға (мәрхүмә инде) рәхмәтем сик­­һеҙ. Уларҙың һәр береһе үҙ эш­тәренең оҫталары ине. Бер ауырһынмайынса, бер-бере­беҙ­гә һүҙ менән дә, эш менән дә яр­ҙам­лашып йәшәнек. Бала­ла­ры­быҙ ҙа шунда үҫте, - тип хә­ти­­рәләргә бирелде Галина Евгеньевна.
Буласаҡ тормош иптәше Рә­шит Рәсим улын Галина Ҡыр­мыҫ­ҡалыла осрата. Матур итеп ғаилә ҡоралар. Гүзәл исемле һы­лыу ҡыҙҙарына ғүмер бирәләр. Ҡәйнәһе Бибинур апай ҙа ты­ныс холоҡло һәм уңған киленен үҙ ҡыҙылай ҡабул итә. Ире ғүмер буйы Көнкүреш йортонда һы­уыт­ҡыстар, көнкүреш техни­ка­һын төҙәтеүсе мастер булып эшләне. Ҡыҙғанысҡа ҡаршы, бер нисә йыл элек ул фани донъянан китеп барҙы.
Бөгөнгө көндә Галина хаҡлы ялда. Ҡыҙы үҙ аллы йәшәй, се­бер тарафтарына йөрөп эшләй. Галина Евгеньевна баҡса үҫте­рергә ярата, тәҙрә төбөндәге гөл­дәре лә шау сәскәлә ултыра.
Ә район гәзите редакция­һында эш дауам итә – коллектив бер ҡаҙанда ҡайнай, бер маҡсат менән яна. Хатта умарта ояһын хәтерләтә: берәүҙәр коман­ди­ровкаға китә, икенселәре ҡайта, кемдер мәҡәлә яҙа, кемдер әҙер яҙманы урынлаштыра, хаталарын төҙәтә...
Венера ҒАФАРОВА.
Автор фотоһы.