Йәшәү йәме - ғаиләлә

 Ғаилә - күңелдәрҙе йылыты­рлыҡ усаҡ, ҡыуаныстарҙы ур­таҡлашып, көйөнөстәрҙе бергә күтәргән, бер-береһенә терәк булып, аңлашып, ғүмер юлынан етәкләшеп атлаусы кешеләр. Йәмғиәтебеҙ ҙә тап ошондай та­тыу, өлгөлө ғаиләләргә таяна. Районыбыҙҙа ғаилә ҡиммәттәрен һаҡлап, берҙәм, татыу, башҡа­ларға өлгө булып йәшәгән парҙар бик күп.

Район Мәҙәниәт һарайы­ның кесе залында Рәсәйҙә Ғаилә йылына арналған “Йыл ғаиләһе” район конкурсы еңеүселәрен бүләкләү тантанаһы үтте.

- Ғаилә - ул тыуған йорт, бер-береңде ярты һүҙҙән аңлау, шатлыҡты ла, ҡайғыны ла бер­гә бүлешеү. “Йыл ғаиләһе” кон­курсының район этабында ғаилә ҡиммәттәрен һәм йолаларын хөр­мәт иткән ғаиләләрҙең ҡатнашы­уы бигерәк тә ҡыуаныслы, - тине тантананы алып барыусы Ольга Исхаҡова унда ҡатнашыусыларҙы сәләмләп. Артабан һүҙ муници­паль район хакимиәтенең социаль мәсьәләләр буйынса урынбаҫары Гөлнара Иҫәнбаеваға бирелде.

- Ғаилә - ул бөтә нимәнең дә нигеҙе, уның асылы бала саҡтан һалына. Беҙ балаларыбыҙҙы нисек тәрбиәләйбеҙ, ғаиләбеҙ, йәмғиә­тебеҙ, илебеҙҙең киләсәктәге әхлаҡ кимәле, хәл торошо, ты­ныслығы ла шуға бәйле буласаҡ. Беҙ кескәйҙәргә һәм ололарға ҡарата иғтибарлы, ихтирамлы, мәрхәмәтле, шәфҡәтле булырға, нисек йәшәргә кәрәклеген үҙ өл­гөбөҙҙә күрһәтәбеҙ. Бөгөн бында булған һәр ғаиләгә рәхмәт бел­дерәбеҙ. Һеҙ барығыҙ ҙа иғтибарға лайыҡ, матур балалар тәрбиәләй­һегеҙ, ғаилә йолаларын һаҡлай­һығыҙ, ә инде еңеүселәребеҙгә республика этабында уңыштар теләйбеҙ, - тине Гөлнара Мәҡсүт ҡыҙы һәм “Йыл ғаиләһе” кон­курсында әүҙем ҡатнашыусы Фәйзуллиндар, Әминевтар, Баһа­уетдиновтар, Лоҡмановтар, Мак­симовтар, Дәүләтбаевтар һәм Самиҡовтар ғаиләләренә Дипломдар тапшырҙы.

Артабан төрлө номинация­ларҙа еңеүселәр тәбрикләнде. Әй­ткәндәй, был конкурс дүрт номи­нация буйынса үтте. Шулай итеп “Алтын ғаилә” номинацияһында Прибельский ауылынан Матю­шиндар ғаиләһе еңеүсе булды. Уларҙың ғаилә тормошо 42 йыл дауам итә. Владимир Иванович менән Наталья Викторовна ике ул – Максим һәм Алексейҙы тәр­биәләп үҫтергәндәр. Матюшин­дар ғаиләһендә бик күп мауығы­уҙар һәм ғаилә йолалары бар. Улар райондың йәмәғәт эшмәкәрле­гендә әүҙем ҡатнаша, Прибель­ский ауылының Бөтә изгеләр ғибәҙәтханаһын (Всехсвятский храмын) төҙөүгә хәйриә иғәнәсе­леге күрһәтәләр. Бынан тыш “Бөтә быуын диңгеҙселәренә” иҫтәлекле стелла төҙөүгә лә матди ярҙам ҡулы һуҙғандар. Матюшин­дар ғаиләһе илдәге бөгөнгө хәлгә лә битараф түгел. Мәрхәмәтлек күрһәтеп ғаилә ай һайын махсус хәрби операцияла ҡатнашыусы яугирҙәрҙең ихтыяждарына аҡса күсерә. Әйткәндәй, Матюшин­дарҙың улдары ла махсус хәрби операция яугире.

“Күп балалы ғаилә” номи­нацияһында Сахай ауылынан Айгөл Хәйрулла ҡыҙы һәм Ай­нур Сабит улы Мөхәмәтшин­дар ғаиләһе еңеүсе тип табылды. Ғаилә башлығы конвой идара­лығында кесе инспектор, ҡатыны Рәсәй Һаҡлыҡ банкында эшләй. Мөхәмәтшиндар биш сәскәләй ҡыҙға ғүмер биргәндәр. Был ғаиләне бик күп яҡты һәм изге йолалар берләштерә. Улар һәр бе­реһенең тыуған көнөн иҫтәлекле итеп билдәләй, йорт хайуандарын тәрбиәләйҙәр, ялдарын күңелле һәм файҙалы үткәрергә яраталар.

- Аллаға шөкөр, ҡыҙҙарыбыҙ шул тиклем тыныс, аҡыллы һәм тәртипле. Беҙҙең өсөн иң беренсе урында сабыйҙарыбыҙҙың иҫән-һау һәм бәхетле булыуы мөһим, ти - Мөхәмәтшиндар.

“Ауыл ғаиләһе” номинаци­яһына Олокүл ауылынан Динара Исмәғил ҡыҙы һәм Марат Мөнир улы Ғизәтуллиндар лайыҡ булды. Ғизәтуллиндар ғаиләһе ике ул һәм бер ҡыҙ тәрбиәләй. Улар шәжәрә һәм ғаилә байрамдарына айырыу­са етди ҡарай. Ғизәтуллиндар буш ваҡыттарын ғаилә менән бергә үт­кәрергә ярата. Шулай уҡ улар па­триотик тәрбиәгә айырыуса иғти­бар бүлә. Бөгөнгө көндә Динара Исмәғил ҡыҙы Олокүл ауылының «Патриот» ирекмәндәр штабы ко­ординаторы булып тора.

“Йолаларҙы һаҡлаусы ғаилә” номинацияһында Иҫке Ҡыйышҡы ауылынан Әлфиә Фарид ҡыҙы һәм Рим Ғәле улы Миһрановтар еңеү яуланы.

Миһрановтар ғаиләһендә Рәсәйҙең дүрт лайыҡлы гражданы үҫә. Һәр бер ғаиәләлә быуын­дан-быуынға күсеп килгән нин­дәйҙер йолалар бар. Улар ғаилә ағзаларын берләштерә, туған­лыҡ ептәрен нығыта. Миһра­новтарҙың да үҙҙәренә генә хас ғаиләне хөрмәт итеү, ғаилә бай­рамдарын бергәләп үткәреү, сәләмәт тормош алып барыу кеүек үҙ йолалары бар.

Артабан сарала ҡатнашыусылар видеопрезентация аша ғаиләләрҙең йолалары, шәжәрәһе, көнитмеше менән танышты.

Ғаиләгә иғтибарҙы арттырыу, ғаилә төшөнсәһенең дәрәжәһен күтәреү яғынан был, әлбиттә, ыңғай күренеш. Һәр ғаиләнең үҙ тарихы, йолалары, кәсебе булһа, милли ғөрөф-ғәҙәттәр һаҡланһа, йола быуындан-быуынға күсәсәк, киләсәгебеҙ ныҡ буласаҡ.

Сара һуңында район мәҙә­ниәт һарайы артистары Фәрит Яҡшығолов, Филүс Шәңгәрәев, Лилиә Ғәҙелшина, “Егеттәр” ан­самбле, Зилә һәм Рафаэль Ҡоҙа­шевтар тамашасыларға үҙҙәренең моңло ла, дәртле лә йырҙарын бүләк итте.

Ғаилә – туғанлыҡ ептәре менән бәйләнгән бәләкәй йәмғиәт ул. Ошо йәмғиәттәге татыулыҡ, берҙәмлек, бер-береңә иғтибар һәм ихтирам тойғолары ундағы матур традициялар аша тәр­биәләнә. Ғаилә йолаларығыҙ оҙаҡ йылдар дауам итһен. Барығыҙ ҙа һау-сәләмәт, оҙон ғүмерле бу­лығыҙ.

Фирүзә РӘХМӘТУЛЛИНА.

Автор фотолары.