Закон һәм хоҡуҡ һағында

Тәфтишсе һөнәре күптәр өсөн серлелек һәм романти­ка солғанышы менән уратып алынған. Был һөнәр эйәләре тураһында һүҙ сыҡһа, енәйәт­тәрҙе асыу, күҙәтеү, эҙәрлекләү, енәйәтселәрҙе тотоу күҙ алдына баҫа. Кем һуң ул тәфтишсе?

Һөнәри байрамдары ал­дынан Ҡырмыҫҡалы районы­ның бүлек начальнигы урын­баҫары, Рәсәй Эске эштәр министрлығының район буй­ынса тәфтиш бүлексәһе етәк­сеһе, юстиция подполковнигы Фәнзил Фәйзелхан улы Хәй­ертдинов менән осраштыҡ.

Ҡырмыҫҡалының 2-се мәк­тәбен тамамлаған егет Рәсәй Эске эштәр министрлығы­ның Өфө юридик инситуты­ның енәйәт эҙләү (уголовный розыск) факультетына уҡы­рға инә. Таныштары, дуҫтары араһынан был ысын ир-егеттәр һөнәрен алған егеттәр байтаҡ була. Шуға ла ул һис тә уйлап тормай яуаплы һөнәргә эйә бу­лырға ҡарар итә. Был һөнәргә хаҡлыҡ яратыуы һәм спорт­сы булыуы ла булышлыҡ итә. Диплом алғас, тыуған районға эшкә ҡайта. Бында йәш хеҙмәт­кәр эш мәленә төшөнә, үҙе өсөн күп яңылыҡтар, ҡыҙыҡлы нимәләр аса, тәжрибә туплай. Ул хеҙмәтен ЮХХДИ-ла ад­министратив законсалыҡты үтәү буйынса инспектор булып башлап, эксперт-кримина­лист булып дауам итә. Шунан тәүтикшереү (дознание) бү­легендә эшләй. 2022 йылдың башынан тәфтиш бүлегендә - тәүҙә тәфтишсе һәм артабан 2023 йылдың апреленән район бүлеге начальнигы урынбаҫары - тәфтиш бүлексәһе начальни­гы. Шулай итеп, байтаҡ еңел булмаған юл үтеп, етәксе вази­фаға етә.

Әйткәндәй, мәктәп йә­шенән спорт менән дуҫ булған егет Эске эштәр органдарында эшләгәндә лә унан айырылмай: биатлон – уның иң яратҡан спорт төрө. Ярыштарҙа гел призлы урындар ала. Был ту­рала эш урынындағы бик күп Маҡтау ҡағыҙҙары, Дипломдар һәм Рәхмәт хаттары һөйләй. Спорт буйынса алған Маҡтау ҡағыҙҙары араһында “Иң яҡшы тәфтишсе” дипломы ла сте­наһын биҙәй.

- Тәфтиш бүлегендә штат буйынса алты хеҙмәткәр бу­лырға тейеш булһа ла, дүрт кеше эшләйбеҙ. Минең бу­рыс - енәйәттәрҙе асыуҙы һәм тикшереүҙе ойоштороу. Беҙ төрлө категориялағы эштәрҙе тәфтишләү менән шөғөлләнә­беҙ. Эш графигы норма буйын­са түгел, көнө-төнө буйынса ла эшләргә тура килә. Ниндәй хәл булһа ла, үҙеңде ҡулға алып, ар­табан законлы һәм нигеҙле ҡа­рар ителһен өсөн тырышабыҙ. Беҙ стресҡа сыҙамлы, һәр кем менән уртаҡ тел табырға тей­ешбеҙ һәм, әлбиттә, маҡсатҡа ирешеү мотлаҡ, - ти Фәнзил Фәйзелхан улы.

Форсаттан файҙаланып, Һеҙгә еңел булмаған эшегеҙҙә уңыштар, артабан да һөнәри бурыстарығыҙҙы өлгөлө үтәүе­геҙҙе теләйбеҙ.

Фәниә СӘЛИМГӘРӘЕВА.

Автор фотоһы.