“Баҡса туйындыра ла, һөйөндөрә лә”

Сахай ауылынан балалар баҡсаһында тәрбиәсе булып эшләгән Наилә Бәҙ­рет­динова ла ана шундай уңған баҡса­сы­лар­ҙан һанала. Уның баҡсаһындағы йә­шел­сәләре һәм емештәре йылдан-йыл мул уңыш менән һөйөндөрә, ә урам тултырып үҫтергән сәскәләре күҙҙең яуын алып тора. Улар тирәһендә әкиәт ге­рой­ҙары, төрлө һындар ҙа күркәмлек бирә.
- Ауыл ерендә йәшәгәс, барыһын да үҫтерге килә. Шуға ла көндәр буйы эштә булһам да, өлгөрөргә тырышам. Сәскәләр бик яратам, уларҙы матурлыҡ, кәйефте күтәреү өсөн үҫтерәм. Иртән тороп, тышҡа сыҡһам, улар миңә шатлыҡ бүләк итәләр. Емеш ағастарым һәм ҡыуаҡ­та­рым да - алма, груша, сейә, ҡарағат, бөр­лө­гән, ҡурай еләге мул уңыш менән ҡы­уандыралар. Ә кишер, һуған, ҡыҙыл сөгөл­дөр, кәбеҫтә, ҡабаҡ һәм башҡа төр­лө йәшелсәләрҙе тик үҙебеҙ өсөн генә үҫтер­һәм, бәрәңгенең артҡанын йыл да һатам. Әлбиттә, килем алыу өсөн тыры­шырға тура килә. Һәр нимә тәрбиә ярата бит.
Март аҙаҡтарында мөгәрәптән бәрәң­геләрҙе сығарып, тәҙрә төптәренә яҡтыға төрлө һауыттарға ултыртып йәшел­ләндереп, шыттырам. Шулай итһәң, ергә ултыртҡас, тиҙ генә үҫеп сыға, көслө лә була. Ғүмер буйы ике төрлө бәрәңгене ултыртам, орлоҡто алыштырғаным юҡ. Бер йылда ла һынатмайҙар. Алты-ете тоҡ сәсәм дә, көҙөн утыҙ тоғон һатам. Быйыл да утыҙ мең аҡса эшләнем. Иш янына ҡуш булып ҡала. Өс улым бар: Ленар һәм Флорис үҙ тормоштары, үҙ ғаиләләре менән йәшәһә, кесе улым Данир авиация техникумының 3-сө курсында белем ала. Уны уҡытыу өсөн был аҡса ҙур ярҙам. Ҡыҙғанысҡа, аталары Ринат Мөхәмәтдин улы ун ике йыл элек яман сирҙән вафат булғайны, - тип һөйләне Наилә Наил ҡыҙы.
Бер ваҡытта ла ҡул ҡаушырып ултырмаған тырыш ҡатын үҫтергән йәшелсә-емештәрен банкаларға тултырып консервалап та ҡуйған. Ҡышҡылыҡҡа ҡайнатма, компоттар, салат, лечолар, тоҙланған, маринадланған йәшелсәләр – барыһын да булдырған. Уның һүҙҙәре буйынса, баҡса туйындыра ла, һөйөндөрә лә. Бынан тыш йәйҙәрен күпләп ҡош-ҡорт та аҫрарға ғәҙәтләнгән. “Үҙең етештергән ризыҡҡа етәме ни?!” - ти ул һөйөнөп.
Маҡсатлы, һәр эште еренә еткереп эшләгән Наилә Бәҙретдинова уңышты үҙ көсө, үҙ тырышлығы менән булдыра.
Фәниә Сәлимгәрәева.
Фирүзә Рәхмәтуллина фотоһы.