Ғүмер буйы ошо ерҙә

Түбәнге Төкөн ауылын­да­ғы “Ҡормаева” хужалығы ла үҙенең уңған, тырыш хеҙмәт­сән­дәре менән билдәле. Ме­ханизаторҙар һынатмай эш­ләһә, ырҙын таба­ғында ла ҙур эштәр башҡарыла. Хеҙ­мәтсәндәр араһында үҙе хеҙ­мәт иткән хужалыҡты үҫ­те­реүгә бар ғүмерен ар­на­ған, инде хаҡлы ялдағы Миң­нур Ҡаһирова ла бар. Ху­жа­лыҡтың исеме нисек үҙгәрһә лә, ул һәр саҡ ошо ерҙә хеҙмәт итә.
Мырҙа ауылында тыуып үҫ­кән ҡыҙ 18 йәшендә генә Тү­бәнге Төкөн ауылы егете Әнүәр Мәжит улына кейәүгә сыға. Килен булып төшөү менән ул ваҡыттағы Куйбышев исемен­дәге колхоз эшенә егелә. Тәүҙә оҙаҡ йылдар фермала һыйырҙар һауа. Ул саҡта бар эштәр ҙә ҡул көсө менән башҡарыла. Башҡалар менән бер рәттән үҙенә беркетелгән һыйыр­ҙарҙы ҡул менән һауа, һа­уылған һөттө биҙрәләр менән икенсе бүлмәләге һауытҡа ташый. Шулай уҡ малдарға апра ташый, аҫтарын таҙарта. Тормош иптәше ме­нән өс балаға ғүмер бирәләр. Әлеге көндә барыһы ла үҙ аллы тормош көтәләр.
Почтальон булып та бер нисә йыл эшләп ала. Шуға ла матбуғатҡа һөйөүе көслөлөр, күрәһең. Бер ваҡытта ла ра­йон гәзитенә яҙылмай ҡал­май ул. Артабан хаҡлы ялға тиклем баҫыуҙарҙа сө­гөлдөр үҫтерә. Ҡайҙа эшләһә лә, на­мыҫлы хеҙмәт итә. Әле лә өй­ҙә тик торорға яратмай. Тәүҙә сәсеүгә әҙерлек эштәрендә ең һыҙғанып көс түкһә, артабан ҡыҙыу ураҡ осоронда 70 йәшенә аяҡ баҫырға торғанда ла ырҙын табағына ярҙам­лашырға эшкә йөрөй. Ашлыҡ киптереү, таҙартыу эштәрен башҡарыуҙа Миңнур Хөрмәт ҡыҙының да өлөшө бар. Иген яҡшы һаҡланһын, орлоҡ сифатлы булһын өсөн уның эше ҙур әһәмиәткә эйә. Келәт мө­дире Илнур Ишем­ғоловтың һүҙҙәре буйынса, ул тырыш эшсе. Әйткәндәй, тырыш­лыҡ ҡандан да килә. Шулай булмай ни, ул бит танылған сөгөлдөрсө, Социалистик Хеҙ­мәт Геройы Банат Баты­рованың ейәнсәре!
Өҫтәлдәрҙә икмәк бул­һын өсөн күпме хеҙмәт һәм көс талап ителә. Үҙенең дә ошо мөһим эшкә хеҙмәте һа­лыныуына Миңнур Ҡаһи­ро­ва сикһеҙ ғорурлыҡ хистәре кисерә.
Фәниә Сәлимгәрәева.
Автор фотоһы.