Даирә
-3 °С
Болотло
Бөтә яңылыҡтар
Ауыл уңғандары
27 Апрель 2022, 16:51

Алтын утта һыналыр, әҙәм эштә һыналыр

Игенселәр өҫтәлдә икмәк бул­һын өсөн ал-ял белмәй тир тү­гә. Улар йылдың һәр миҙ­ге­лен­дә лә ошо йүнәлештә эшләй: техника ремонтлап, алдағы ба­ҫыу эштәренә әҙерләй, шулай уҡ эш араһында ҡушылған башҡа эштәрҙе лә башҡара.

Алтын утта һыналыр,  әҙәм эштә һыналыр
Алтын утта һыналыр, әҙәм эштә һыналыр

“Шаиморатов” йәм­ғи­ә­­те­нән Рәсим Моратшин 42 йыл тыуған ерендә хеҙмәт итә һәм йылдан-йыл алдын­ғы­лыҡ­ты бир­мәй. Эш дәүерендә ауыл хужалығы эшсәндәре ара­­һын­да данлыҡлы механизатор бу­лып таныла ул. Фиҙаҡәр хеҙ­мәте өсөн етәкселек тарафынан юға­ры баһалана. Шу­лай, “Баш­ҡортостандың ат­ҡа­ҙанған ауыл хужалығы хеҙ­мәткәре” ти­гән маҡтаулы исем ала, БР Президенты М.Рә­химов исе­ме­нән Рәхмәт хаты, СССР ха­лыҡ хужалығын үҫтереүҙә күр­һәткән уңыш­тары өсөн брон­за миҙал, “Башҡортостан Республикаһында күрһәткән фиҙаҡәр хеҙмәттәре өсөн” бил­дәһе, шулай уҡ йыл һайын тиерлек район хакимиәтенән, үҙе эшләгән хужалыҡтан Дипломдар, Маҡтау ҡағыҙҙары һәм Рәхмәт хаттары менән бүләкләнеүе күп нимәләр ту­ра­һында һөйләй.
Тәжрибәле механизатор­ҙың һәр саҡ техникаһы төҙөк, эш­кә әҙер була. Баҫыу эш­тә­рен­дә - сәсеү, тәрбиәләү һәм уңыш йыйыу – барыһы ла уның ҡатнашлығынан башҡа уҙмай. Ул тракторы менән ер һөрә, культивация үткәрә, ерҙе йомшарта, иген тейәй, сәсә, тиреҫ сығара... Ә инде 15 йыл элек уға сит ил маркалы JCB тракторы ышанып тапшыры­ла. Уның тейәгес ҡоролмаһы ярҙамында баҫыуға сәсеү өсөн орлоҡ, мал аҙығы өсөн төр­гәк­ле һалам-бесән ташый. Рәсим Әсхәт улы ауыл хужалығының һөҙөмтәлелеген арттырыуға ет­ди иғтибар биреп, фиҙаҡәр хеҙ­мәт итә һәм ҙур уңыштарға, юғары күрһәткестәргә өлгәшә. Тормош елдәренең ҡайһы яҡ­ҡа иҫеүенә, ауыл хужалығында ниндәй үҙгәрештәр булыуына ҡарамаҫтан, Рәсим Моратшин тыуған еренә һәм механизатор һөнәренә тоғро ҡала. Тыуған ере­нә, крәҫтиән хеҙмәтенә һө­йөүе килеп сыҡҡан ауыр­лыҡ­тар­ҙы, кәртәләрҙе еңеп сығыр­ға ҡеүәт бирә.
- Бер ваҡытта ла тыуған ауы­лымдан китергә уйламаным. Үҙ еремә һөйөү хистәре ғү­мер буйы миңә ошонда ты­ры­­шып хеҙмәт итеүгә көс би­рә. Ғөмүмән, иртә таңдан эш­­кә барып, алға алған бурыс­ты үтәргә күнеккәнмен. Үҙем­де ер кешеһе тип иҫәпләйем, башҡа һөнәрҙе күҙ алдына ла килтерә алмайым. Механизатор хеҙмәте миңә уҡыусы саҡ­тан таныш. Иген һуҡҡан ком­­­байн­да комбайнсы ярҙам­сыһы булып эш­ләнем, - тип һөйләне тынғыһыҙ ялан батыры.
Рәсим Моратшин һәр йыл­да ла илебеҙҙе ауыл хужалығы продукцияһы менән тәьмин итеү­гә үҙ өлөшөн лайыҡлы ин­дерә. Әлеге көндәрҙә игенсе сәсеү эшенә дәртләнеп то­тонған.
Баҫыуҙарҙа төрлө техникалар гөрләй. Киләһе уңыш өсөн ауыл эшсәндәре күп көс түгә. Ә бәрәкәтле ер уларҙы уңышы менән ҡыуан­дырыр.
Фәниә Сәлимгәрәева.
Автор фотоһы.

Автор:
Читайте нас: