Льготалылар өсөн дарыуҙар запасы ярты йылға етергә тейеш

Рәсәйҙә үҙебеҙҙә етештерелгән медицина изделиелары етерлек, ассортиментты киңәйтеү тураһында уйларға кәрәк, тип белдерҙе Рәсәйҙең һаулыҡ һаҡлау министры Михаил Мурашко «Рәсәй-1» телеканалы эфирында күрһәтелгән «Мәскәү. Кремль. Путин» программаһына интервьюһында.

Һаулыҡ һаҡлау министры билдәләүенсә, Рәсәйҙә титандан һәм башҡа материалдарҙан медицина изделиелары әҙерләгән производстволар етерлек.

«Улар етештерелә, мәсьәлә ассортимент сәйәсәтен киңәйтеүгә ҡайтып ҡала», — тип хәбәр итте ТАСС Михаил Мурашконың һүҙҙәренә һылтанма менән.

Министр билдәләүенсә, Рәсәйҙә хәҙер ҡайһы бер дарыуҙарға һорауҙың норманан 10 тапҡырға күберәк булыуы күҙәтелгән.

«Иң ғәжәбе шул: препараттарҙың яраҡлылыҡ ваҡыты бар. Ҡайһы берҙәренең ике йыл ғына. Был дарыуҙарҙы билдәле бер ваҡыт эсендә эсеп бөтөп булмай бит», — тине ул. Шулай уҡ Мурашко ил төбәктәрендә льготалылар өсөн дарыу запасы ярты йылға тиерлек етерлек икәнен әйтте.

https://bash.bashinform.ru/news/social/2022-03-28/lgotalylar-s-n-daryu-ar-zapasy-yarty-yyl-a-eterg-teyesh-r-s-y-e-auly-a-lau-ministrly-y-2746006