Мәктәптән һуң тығыҙыраҡ аралашыу өсөн минең өйөмә киттек, табын әҙерләп рәхәтләнеп ултырҙыҡ. Оҙаҡ ҡына ултырһаҡ та, һүҙҙәребеҙ бөтмәне. Тимәк, тыуған мәктәбебеҙ беҙҙе берләштергән, дуҫлыҡҡа тоғро иткән!
Класташтар осрашыуы – иң тулҡынландырғыс осрашыу. Хистәрҙең сиге булманы! Йылдар олоғайтһа ла, төҫ-ҡиәфәттәрҙе үҙгәртһә лә, күрешкәс, йәшәреп, бала саҡҡа ҡайтҡандай булдыҡ.
Беҙ Иҫке Бәпес мәктәбен 1970 йылда 21 уҡыусы тамамланыҡ. Әллә ҡайҙа ҡалған балалыҡ булһа ла, һәр нимә хәтерҙә, иҫтәлектәребеҙ уртаҡ. Тылсымлы мәктәп иле беҙгә белем бирҙе, бында дуҫтар таптыҡ, эшһөйәрлеккә, намыҫҡа, дуҫлыҡтың ҡәҙерен белергә, изге күңелле, ярҙамсыл булырға, тормошто яратырға, йәшәүҙең ҡәҙерен белергә, яҡшыны ямандан айырырға, сер һаҡларға, бер-беребеҙҙе яҡларға өйрәтте. Класс сәғәттәре, тимур командалары, макулатура, тимер-томор йыйыуҙар, бергәләшеп мәктәп баҡсаһында, баҫыуҙарҙа сөгөлдөр эшләүҙәр, экскурсиялар, генераль йыйыштырыуҙар, политинформациялар, кисәләр... – барыһы ла хәтерҙә ҡалған.
Һәр класташ ҡәҙерле. Иге-сиге булмаған тәрән хистәрҙе аңлатырға ябай һүҙҙәр генә етмәй кеүек... Тормоштағы, ғаиләләге төрлө хәлдәр, уңыштар, ғорурланырлыҡ нимәләр менән уртаҡлаштыҡ.
Осрашыуҙа уҡытыусыларыбыҙҙы барланыҡ. Хәҙер инде күптән ер ҡуйынын түшәк иткән белем иленә алып барыусыларҙы берәм-берәм иҫкә төшөрҙөк: Камила, Менәүәрә апалар, Рәжәб, Наил, Хөрмәт, Мәхмүт, Ирек абыйҙар (беҙ уҡытыусыларыбыҙҙы шулай атай инек)... Уларға бәйле иҫтәлектәргә туҡталдыҡ. Уҡытыусыларыбыҙҙың барыһын да партанан-партаға йөрөп тырышып дәрестәрҙе аңлатыуҙары күҙ алдында, тауыштары ҡолаҡҡа ишетелгәндәй. Шулай уҡ Роза Мөхәмәтҡолованың һәм Зилә Ҡолоҡаеваның рус теленән төплө белем биреүҙәре, Клара Абакачеваның математиканан уҡытыуы һәм район үҙәгенә комсомолға индерергә алып барғаны хәтерҙә. Беҙ уның менән бергәләп ДТ тракторында, һалам түшәлгән арбала барғайныҡ. Ҡайтҡанда буран сығып китеп, Ҡарлыман ауылы клубында ҡунып та сығырға тура килгәйне... Артабан мин үҙем уҡытыусы булдым. Ғәлинур Йыһанур улы Камалов менән бергә эшләгән йылдарымды һағынып иҫкә алам.
Ҡайҙа ғына яҙмыш илтмәгән дә, ниндәй генә тормош, һынауҙар насип итмәгән класташтарыма... Шулай ҙа һынатмағанбыҙ. Арабыҙҙа төрлө ерҙәрҙә һәм ауылда, үҙ төйәгебеҙҙә йәшәүселәр ҙә бар. Әммә ҡайҙа ғына йәшәһәк тә, ниндәй һөнәрҙәргә эйә булһаҡ та, тормошта үҙ урындарыбыҙҙы тапҡанбыҙ. Ҡыҙғанысҡа, арала бишәүебеҙҙе аяуһыҙ яҙмыш ваҡытһыҙ баҡыйлыҡҡа алып китте. Уларҙы йылы хәтирәләр менән телгә алдыҡ.
Бына шулай бер аҙға – бер нисә сәғәткә генә булһа ла, мәктәп йылдарына, бала саҡҡа ҡайтып, үҙебеҙҙе уҡыусылар итеп хис итергә тура килде. Тағы ла киләһе йыл осрашырға тип һүҙ ҡуйыштыҡ.
Бер көндө йәлләмәй, эш-мәшәҡәттәрҙе ҡалдырып осрашырға килгәнегеҙ өсөн ҙур рәхмәт. Тимәк беҙ бер-беребеҙҙе ихтирам итәбеҙ, һағынышҡанбыҙ, осрашырға теләгәнбеҙ. Тағы ла күрешкәнгә тиклем иҫән-һау булайыҡ!
Зәбирә Ғәҙелшина.
Иҫке Бәпес ауылы.