Даирә
+12 °С
Ясна
Бөтә яңылыҡтар

Сәнғәт юлын һайлаған

Иң матур, хыялға бирелеү, үҙеңдең артабанғы тормошоңдо күҙал­лау һәм асыштар осоро ул - йәшлек. Төрлө өлкәлә ҙур ҡаҙаныштарға ирешкән, маҡсаттарына табан ышаныслы аҙымдар яһаған йәштәр һәр саҡ беҙҙә ғорурлыҡ тойғоһо уята. Ҡырмыҫҡалыла йәшәгән 22 йәшлек Дамир Ишембаев – шундай һәләтле, талантлы һәм әүҙем йәштәре­беҙҙең береһе.

Сәнғәт юлын һайлаған
Сәнғәт юлын һайлаған

Ҡарлыман ауылында тыуған Дамир башланғыс белемде ошонда ала. Ауыл клубында эшләгән әсәһенә эйәреп, ул бала саҡтан сәнғәт өлкәһендә тәүге аҙымдарын эшләй - клубта үткәрелгән байрамдарҙа йырлай һәм бейей. Етенсе класҡа Ҡырмыҫҡалының С.М.Чугункин исемендәге 1-се мәктәбенә уҡырға кил­гәс тә ул төрлө сараларҙа әүҙем ҡатнаша. Туғыҙынсы класты тамамлағас, Дамир һөнәри-техник училищела иретеп йә­бештереүсе һөнәрен үҙләштерә.

- Ир-егет өсөн был һөнәр бик мөһим һәм кәрәкле, тип уйлайым. Хеҙмәт юлымды был йүнәлеш буйынса башла­маһам да, ауылда бөтә эштәрҙе үҙем башҡарам, - ти ул был хаҡта.

Училищела уҡыған саҡта Дамир ”Йәшлек” йәштәр үҙәге эшендә ҡайнап йәшәй, волонтер була, йәштәр дискоте­каларында диджей булып эшләй.

Тырыш егет туғыҙ йыл буйына “Ша­яндар һәм тапҡырҙар клубы”нда шөғөл­ләнә һәм, хатта, үҙенең командаһын ту­плап, Өфөлә үткән финал уйындарында ҡатнашыуға өлгәшә.

- “Шаяндар һәм тапҡырҙар клубы”н­да шөғөлләнеү миңә бик оҡшай. Яңы ко­манда төҙөп, был эште тергеҙеп ебәрергә уйлайым, - ти Дамир яратҡан шөғөлө ту­раһында.

Училищены уңышлы тамамлағас, Дамир Ишембаев сауҙа өлкәһенә эшкә урынлаша һәм район Мәҙәниәт һарай­ында Салауат Әйүпов етәкләгән “Дәрт” төркөмөндә йырлай башлай. Һуңынан инде үҙе лә Мәҙәниәт һарайына тауыш операторы вазифаһында эшкә урынла­ша, ситтән тороп М.Аҡмулла исемендә­ге Башҡорт дәүләт педагогия универси­тетына музыкаль белем биреү педагогы һөнәре буйынса уҡырға инә. Бөгөнгө көндә ул 4-се курс студенты.

Театр артисы булараҡ та оҫта­лығын һынап ҡарай йәш егет һәм рай­он Мәҙәниәт һарайында эшләп килгән “Сатҡылар” халыҡ театры ҡуйған Ә. Ат­набаевтың “Игеҙәктәр – илгәҙәктәр”ко­медияһында үҙенә тапшырылған ролде оҫта итеп башҡара. Бөгөнгө көндә Да­мир Ишембаев сәхнәлә “Дәрт” төркөмө менән дә, яңғыҙ ҙа йырҙар башҡара. Шу­лай уҡ үҙе лә башҡорт һәм рус телдәрен­дә йырҙар ижад итә.

- Ижади эш менән шөғөлләнергә яратам. Киләсәктә лә ошо юлдан бары­рмын, сәнғәттән айырылмаҫмын, тип уйлайым, - ти талантлы егет.

Киләсәгенең яҡты булыуын, алдына ҡуйған пландарының тормошҡа ашыуын теләйбеҙ.

Автор:Розалия Назарова
Читайте нас: