Бәхете – балаларында

Бәхете – балаларында

Әсәйҙәр көнө алдынан Ҡырмыҫҡалы ауылында йәшәүсе 12 балаға ғүмер биргән герой-әсә Рауза Сафина менән танышырға тура килде. Асыҡ сырайлы, ябай, еңел аралашыусан ҡатын менән һөйләшкәндән һуң өйҙәренә барып, ғаилә менән яҡындан танышыу теләге тыуҙы.

 Мине йорт хужалары ҡыҙҙары Реги­на һәм Венера менән ҡаршы алды. Ишек төбөнән үк ике кер йыуыу машинаһы, өҫ һәм аяҡ кейемдәренең иҫ киткес күп булы­уы бында күмәк кеше йәшәгәнлеге хаҡында дәлилләй. Бер-бер артлы биргән һорауҙа­рыма барыһынан да элек кескәй Венера яу­апларға ашыҡты.

-Мин ғаиләлә -иң кесеһе, Радмила менән Камила мәктәптәләр, беҙ икенсе сменала уҡыйбыҙ. Ҡалған ағай-апайҙарым баш ҡалала уҡыйҙар, ҡайһы берәүҙәре үҙ ғаиләләре менән йәшәйҙәр, балалар үҫ­терәләр. Улар беҙгә ҡунаҡҡа ҡайтҡанда күмәкләшеп төрлө уйындар уйнайбыҙ, Яңы йылды бергәләп ҡаршылайбыҙ.

Өс этебеҙ, биш бесәйебеҙ бар. Уларҙы бик яратабыҙ һәм тәрбиәләйбеҙ, -тип тә­телдеге сыҡты ҡыҙсыҡтың. Шул арала тәүге сирек өсөн “4” һәм “5” билдәләре генә теҙелгән көндәлеген, үҙҙәренең йоҡо бүлмәләрен, ҡул эштәрен, апайҙарының миҙалдарын күрһәтергә лә өлгөрҙө.

Илдар Нәжип улы эш менән сығып киткәнсе, ике ҡатлы йорттарына ремонт эшләй башларға әҙерләнеүҙәре, бының өсөн байтаҡ ҡына төҙөлөш материалдарын алып ҡуйыуҙары хаҡында һөйләне. Ремонт эштәренә үҙе тотонорға йыйына икән. Бый­ыл йәй үҙ ҡулдары менән аҙбар төҙөгән, со­ландарын йылытҡан.

Әңгәмәне Рауза Ғәбдрәүеф ҡыҙы менән дауам итәбеҙ. Әлбиттә, уға күп балалы әсәй булырға нисек йөрьәт иттегеҙ, күмәк ғаилә­не ҡарарға ауыр түгелме, тигән күптәрҙе ҡыҙыҡһындырған һорауҙарҙы бирәм.

-Үҙем дә алты ҡыҙ бала тәрбиәләнгән ғаиләлә үҫтем. Әйткәндәй, әсәйемә 91 йәш, апайымдың ғаиләһе менән Ишембай рай­онында йәшәй. Бала саҡтан ауыл ерендәге барлыҡ ауыр эштәрҙе башҡарҙыҡ. Йәшләй генә эшләй башланым, кейәүгә сыҡтым.

 Тәүге иремдән өс балам тыуҙы. Ләкин, эскелек арҡаһында уның менән ун бер йыл йәшәгәндән һуң айырылышырға тура килде.

Яҙмыш шулай ҡушҡандыр күрәһең, вафат булған әхирәтемдең иренә икенсе­гә кейәүгә барҙым. Ул да мине яҡшы белә ине, мин дә уның ышаныслы ир була­сағына шикләнмәнем. Уларҙың балалары булманы.

Хоҙай шулай ҡушҡандыр, Илдарға туғыҙ бала бүләк иттем. Ул бик иғтибар­лы һәм хәстәрлекле тормош иптәше, ми­нең өсөн “йәнем” тип өҙөлөп тора. Бар эштәрҙе лә бергәләп башҡарабыҙ. Ба­лаларҙы балалар баҡсаһына, мәктәпкә, түңәрәктәргә йөрөтөү ҙә уның бурысына инә.

Ҙур ғаиләне тәрбиәләүе ауыр түгелме, тип һорайһығыҙ. Донъя йөгөн икәүләп тартҡанда, уның бер ҡыйынлығын да күрмәйем. Күмәк балалы ғаиләлә үҫкән­гәлерме, балаларыбыҙ үҙ аллылар, бик үткерҙәр һәм уңғандар. Әлеге ваҡытта эргәбеҙҙә мәктәптә уҡыусы дүрт ҡыҙы­быҙ ҡалды. Өсәүһе – студенттар, ҡайтып китеп кенә йөрөйҙәр. Ҡалғандары ҡош­соҡтар кеүек осоп сығып киттеләр, - ти бәхетле әсәй.

Күп балалы әсә йөгөн тартыуҙан тыш, Рауза бешерергә, йыуырға, йыйыштыры­рға ярата. Быларҙы ул үҙенең бурысы тип кенә түгел, ә ғаиләгә һөйөүен күрһәтеү, өйҙә йылылыҡ һәм бөхтәлек булдырыу мөмкинлеге тип тә һанай. Ғаилә ҡим­мәттәре һәм балалары – уның тормошо­ноң айырылғыһыҙ өлөшө.

Иң оло ҡыҙҙары Алинаға – 33 йәш. Ул Нижневартовск ҡалаһында йәшәй, кей­әүҙәре Фәдис менән бер йәшлек улдары Нурланды тәрбиәләйҙәр.

30 йәшлек Эдуард та башлы-күҙле булған. Өс бала атаһы ул. Өфө моторҙар эшләү берекмәһендә эшләй.

Апаһы Алина менән бер ҡалала йәшәүсе Илдарға – 25 йәш, өйләнгән, улы бар.

22-һен тултырған Радмир Ҡырмыҫҡа­лы ауылында йәшәй. Ул да күптән түгел ғаилә ҡорған.

Өфө машиналар төҙөү колледжының 3-сө курсында уҡып йөрөүсе Рената уҡы­уҙан тыш, эшләргә лә, спорт ярышта­рында ҡатнашырға ла өлгөрә.

21 йәшлек Радамир Өфө дәүләт нефть техник университетының 2-се курсында белем алһа, 16 йәшлек Ильяс иһә Өфө колледждарының береһендә автосле­сарға уҡып йөрөй.

9-сы класс уҡыусыһы Ралина, 7-се кластағы Регина менән бишенселәге Ка­мила һәм 3-сө класта уҡыусы Венера ла мәктәптә яҡшы билдәләргә генә өлгәшә.

Ҡыҙғанысҡа ҡаршы, ғаилә 2016 йыл­да ҙур ҡайғы кисерә. 2007 йылғы улдары Илнур 9 йәшендә балалар менән һыу буйында уйнағанда фажиғәле вафат була. Өс айлыҡ ауыры булған Рауза был тетрәндергес ваҡиғаны бик ауыр кисерә. Таянысы Илдар һәм балалары уға ныҡ булырға көс бирә.

Атаһынан күргән – уҡ юнған, ти ха­лыҡ. Илдар Нәжип улы бокс буйынса спорт мастеры. Уның был һөйөүе улда­ры һәм ҡыҙҙарына ла күскән. Радамир – бокс буйынса Өфө ҡалаһы турниры призеры, атаһы кеүек, спорт мастеры дәрәжәһенә ирешкән. Ильяс та спорт­тың был төрөнән республика ярышта­рында юғары һөҙөмтәләр күрһәтә. Ра­лина – бокс буйынса Башҡортостан турнирының бронза призеры. Ул шулай уҡ райондың волейбол командаһы ағ­заһы ла, быйыл район саңғы уҙышында кубок менән дә бүләкләнгән.

Регина, Камила, Венера ла уларҙан ҡалышмай, үҙҙәрен спорттың башҡа төрҙәрендә һынап, гимнастикаға, аэро­бикаға йөрөй. Камила мәрйенләп сигер­гә, һүрәт төшөрөргә, китап уҡырға ярата, Венера үҙ аллы бәйләргә өйрәнгән.

Татыу ғаилә ун йыл элек, иркен ихата­лы, ике ҡатлы йортта йәшәү тураһындағы хыялдарын тормошҡа ашырып, Өфөнән Ҡырмыҫҡалыға күсергә ҡарар иткән. «Саф һауалы, таҙа һыулы ауыл ерендә йәшәргә теләнек. Балаларҙы хеҙмәткә өйрәтеү өсөн дә ауыл күпкә ҡулайыраҡ. Баҡсала эшләгәндә лә, мунса яҡҡанда ла, ашарға бешергәндә лә балалар – ҙур ярҙамсылар. Ҡышын бергәләп саңғыла елдерәбеҙ, мәктәптә уҙғарылған барлыҡ ярыштарҙа ҡатнашабыҙ», – ти Илдар менән Рауза.

Һәр бала үҙ ризығы менән тыуа, тип ҡабатларға ярата Рауза Ғәбдрәүеф ҡыҙы. “Хөкүмәт күмәк балалыларға төрлө ярҙам саралары күрһәтә. Алтынсы бәпесемде тапҡас, 2005 йылда республиканың тәүге Президенты Мортаза Рәхимов ҡулынан «Әсәлек даны» миҙалын алып ҡыуанғай­ным», – тип хәтерләй ул. Туғыҙ йыл элек уларға республикабыҙ «ГАЗель» автома­шинаһын бүләк иткән.

Быйылғы Ғаилә йылы иһә улар өсөн айырыуса ҡыуаныслы башланған: Рауза Ғәбдрәүеф ҡыҙы ун һәм унан күберәк бала үҫтереүсе ҡатындарға тәғәйенлән­гән иң юғары дәүләт бүләгенә – «Ге­рой-әсә» миҙалына лайыҡ булған. Был миҙалға ҡушып, ғаиләгә бер миллион һум аҡса бирелгән. Шуның яртыһын, күптән ниәтләгәнсә, өйҙәрен ремонтлауға тотонғандар.

Әлбиттә, хөкүмәттән генә ярҙам көтөп ултырмай ишле ғаилә. Быйыл яҙ 50-нән ашыу тауыҡ алғандар – балалар көн дә кәрзин тултырып йомортҡа йыя. Бройлер себештәре лә алып үҫтергәндәр, баҡса тултырып сәскән йәшелсә-емеш­тән мул уңыш алғандар.

«Бергәләшеп тотонғанда, тауҙар аҡта­рырға мөмкин. Ваҡытыбыҙ ҙа етерлек», – ти ғаилә башлығы, былтыр икеһенең дә хаҡлы ялға сығыуҙарын билдәләп. Илдар Нәжип улы байтаҡ йылдар Эске эштәр министрлығы системаһында эшләгән, ә Рауза Ғәбдрәүеф ҡыҙы тимер-бетон из­делиелар заводында крансы булған.

- Бер ҡасан да аҡсаға интеккәнебеҙҙе хәтерләмәйем, гел мул йәшәнек. Илдар аҡса эшләүҙең төрлө юлдарын таба ине. Яңы йыл осорҙарында фейерверктар һатҡан саҡтары ла булды.

Шулай ҙа балаларҙы аҡса биреп, ҡо­тортҡаныбыҙ юҡ. Улар һәр береһе үҙҙәре эшләргә тырыша. Кафела һауыт-һаба, иҙән йыуған аҡсалары стипендияларына өҫтәмә булып тора, - ти Рауза.

Эйе, Рауза Сафина – барыбыҙ өсөн дә ныҡлы һәм бәхетле ғаилә ҡорған ҙур йөрәкле һәм һөйөклө әсәй өлгөһө булып тора. Ул бар көсөн үҙ аллы һәм уңышлы балалар тәрбиәләүгә һала. Уларҙы ауыр­лыҡтар менән көрәшергә, ҡаршылыҡтар алдында юғалып ҡалмаҫҡа өйрәтә.

Ер йөҙөндәге барлыҡ әсәләргә лә ҡаҡшамаҫ һаулыҡ, шатлыҡ, бәхет, ырыҫ-ҡот юлдаш булһын. Иңебеҙгә ҡанат ҡуй­ыусы, яҡлаусы, һаҡлаусы кешебеҙ булғас, беҙ үҙебеҙ ҙә ҡанатлы, тимәк, бәхетле. Байрамдар ҡотло, тормоштар бәхетле, донъялар имен булһын!

Гөлсәсәк АЛАСОВА.