Эшсе һөнәр эйәләренә юл асыҡ

Эшсе һөнәр эйәләренә юл асыҡ

Квалификациялы эшсе кадрҙар һәм урта звено белгестәре әлеге мәлдә эш биреүселәр араһында нығыраҡ талап ителә. Бындай шарттарҙа кадрҙар әҙерләүҙә урта һөнәри белем биреү ойошмалары­ның роле объектив арта. Бөгөнгө көндә колледж студенттары белем генә алып ҡалмайҙар, ә шулай уҡ профессиональ тәжрибә лә туплап, мөмкин тиклем иртәрәк оло тормошҡа аяҡ баҫырға һәм карьера төҙөй башлар өсөн ҙур башланғыс та ала. Колледжда уҡыуҙың ыңғай яҡтары күп. Берен­сенән, бында уҡырға инеү вузға ҡарағанда еңелерәк. Икенсенән, ике-өс йылдан һөнәр алып, эш тә башлай алаһың. Бынан тыш, колледждар үҙгәреүсән хеҙмәт баҙары шарттары­на тиҙ яраҡлаша һәм яңы һөнәрҙәр тәҡдим итә ала.

Яңы уҡыу йылы алдынан беҙ Ауырғазы күп профилле колледжының Ҡырмыҫҡалы филиалындағы эштәр менән таныштыҡ. Уҡыу йортоноң яңы етәксеһе Нуриман Ульябаевтың эшкә ныҡлы тотонғаны әллә ҡайҙан уҡ күҙгә салына. Элек һәр бер машина тиерлек колледж биләмәһенә үтә алһа, хәҙер был урындар ҡойма менән уратып алынған.

- Студенттар һәм башҡалар хәҙер бер ҡапҡанан, бер ишектән генә инеп йөрөйәсәк. Был хәүефһеҙлек өсөн бик мөһим, - тип таныштырҙы ул эш ба­рышы менән.

Нуриман Исмәғил улы әйтеүен­сә, быйылғы йылда колледжға иретеп йәбештереүсе һөнәренә уҡырға ки­леүселәр бигерәк күп. Шуға күрә улар, хатта, коммерция бүлеге асмаҡсылар.

-Быйыл ике төркөм йыябыҙ. Бе­ренсеһендә иретеп йәбештереүселәр, ә икенсеһендә хужалыҡ эшселәре белем аласаҡ. Икенсе йылдан логист, социаль хеҙмәткәр, токарь һөнәрҙәре буйынса төркөмдәр булдырырға планлашты­рабыҙ. Әле токарҙәрҙе эшкә урын­лаштырыу буйынса Өфө моторҙар эшләү производство берекмәһе менән килешеү төҙөү өсөн һөйлә­шеүҙәр алып барабыҙ. Яңыраҡ район ветеринария станцияһына ла барып, белгестәр менән ҡытлыҡ юҡмы икә­не тураһында белештем. Белгестәр етмәй, тинеләр. Шуға күрә колледжда кесе ветеринар фельдшерын әҙерләр­гә планлаштырабыҙ. Ошоға тиклем колледжда дүрт курс уҡытыла ине, быйылдан ул ике йылға ҡалдырыла. Шуға күрә төркөмдәрҙе икеләтә арт­тыра алабыҙ, - тигән пландары менән таныштырҙы етәксе.

Колледж етәкселегенең тағы бер ҡыуаныслы яңылығы бар: Мәғариф һәм фән министрлығы йылылыҡ трас­саһын яңыртыр өсөн ике миллион һум аҡса бүлгән.

-Ҡырҡ йыл элек төҙөлгән йылылыҡ трассаһын тиҙҙән яңыртасаҡбыҙ. Әле тағы ла документтар әҙерләйбеҙ. Республика Башлығы Радий Хәбировтың колледждарға ярҙам итеү програм­маһына эләгербеҙ һәм киләһе йыл­да ике корпусҡа ла капиталь ремонт эшләрбеҙ, тигән план менән йәшәй­беҙ. Уҡыу комплексын студенттар өсөн ятаҡ итеп ҡалдырыу, ә ятаҡты уҡыу комплексы итеү идеяһы менән янабыҙ, -тигән ҡыуанысы менән дә бүлеште Нуриман Исмәғил улы.

Быйылғы уҡыу йылы аҙағында кол­леджда белем алыусы 258 студенттың 75-е сығарылған. Уларҙың унауһы тик “5” билдәләренә генә тамамлап, ар­табан юғары белем алырға иҫәп тота. Белеүегеҙсә, Башҡорт дәүләт аграр университеты колледж менән күптән хеҙмәттәшлек итә һәм үҙҙәре үк ки­леп, имтихан алып, бында уҡыған егет-ҡыҙҙарҙы бюджет төркөмөнә ҡабул итәләр. Шулай уҡ быйылдан башлап Өфө фән һәм технологиялар университеты ҡарамағындағы авиа­ция институты менән дә хеҙмәттәшлек итә башлағандар. Шуны ла әйтергә кәрәк: колледжда иретеп йәбеште­реүсе һөнәрен үҙләштереүсе студент­тар төрлө конкурстарҙа ҡатнашып еңеү яулауға өлгәшәләр. Шуныһы ҡыҙыҡ: иретеп йәбештереүсе һөнәренә хәҙер бында егеттәр генә түгел, ә шулай уҡ ҡыҙҙар ҙа уҡый. Колледждың педагог­тар һәм тәрбиәселәр йәһәтенән ҡыт­лыҡ кисермәүе лә ҡыуандыра.

Колледж етәкселеге студенттарҙы илһөйәрлек рухында тәрбиәләү, сәләмәт тормошҡа әйҙәү, спортҡа йәлеп итеү, ирекмәндәр эшен яйға

һалыу эшен дә киңерәк йәйелдереп ебәрергә тигән уй менән йәшәй.

Барлыҡ пландарығыҙ, идеяларығыҙ яҡын киләсәктә бойомға ашһын!

Розалия НАЗАРОВА.

Автор фотоһы.

Республика Башлығы Радий ХӘБИРОВ:

- Беҙҙең өсөн студенттарыбыҙҙың кәйефен, пландарын, урта һөнәри белем биреүҙә бөтәһе лә яҡшымы-юҡмы икә­нен аңлау бик мөһим. Республикаға бөгөн төрлө өлкәләрҙә эшләйәсәк, үҙҙәренең аҡылы, ҡулдары менән хеҙмәт байлығын булдырасаҡ грамоталы белгестәр бик кәрәк. Шуға күрә беҙ республика колледждарына етди иғтибар итәбеҙ. Мәғариф учреждениеларын

модернизациялауға байтаҡ аҡса бүләбеҙ. Һүҙ матди-техник базаны яңыртыу, уҡыу корпустарын һәм ятаҡтарҙы ремонт­лау тураһында бара. Һеҙһеҙ беҙ артабан республикабыҙҙы

алға алып бара алмаясаҡбыҙ.

Нуриман УЛЬЯБАЕВ, йәмәғәтселек фекере ли­деры:

- Башҡортостан Республикаһы башлығы Радий Фәрит улы Хәбиров профессиональ белем биреүгә ҙур ярҙам һәм иғтибар бирә: колледж инфраструкту­раһын үҫтереүгә байтаҡ финанслау бүленә, һәләтле, уҡыуҙа һәм ғилми эшмәкәрлектә юғары һөҙөмтәләр­гә өлгәшкән колледж студенттарына ярҙам күрһә­телә, Рәсәй Федерацияһының «Мәғарифты үҫте­реү» дәүләт программаһының «Профессионалитет» федераль проекты сиктәрендә урта профессиональ белем биреү кластерҙарын үҫтереүгә дәүләт ярҙамы күрһәтеүгә гранттар бирелә.