“Уңыш” йәмғиәтенең көнбағыш баҫыуҙары ла йәй буйы тирә-яҡҡа йәм биреп ултырҙы. Был культура оло юлдан үтеүселәрҙең береһен дә һоҡландырмайынса ҡалмағандыр. Районыбыҙҙа өс йыл ғына эшләп килгән “Уңыш” хужалығында беҙ барғанда эштәр гөр килеп тора ине. Ундан артыҡ «Acros» комбайндары баҫыуҙа көнбағыш ура, “КамАЗ” машиналары һәм трактор йыйылған уңышты ташый. Улар янында, әлбиттә, хужалыҡтың агрономы Владимир Никитин һәм инженеры Радмир Миһранов эшкә етәкселек итә, ярҙам кәрәк булһа, уны үтәү өсөн һәр саҡ эргәләрендә.
- Йәмғиәттә барлығы 1560 гектар ерҙә көнбағыш культураһы сәселде, ә ошо баҫыуҙа культураны 460 гектар майҙанда үҫтерҙек. Уңыштың гектар ҡеүәте 21 центнер тәшкил итә. Быйылғы йыл өсөн был насар түгел. Әйткәндәй, Ҡырмыҫҡалы районында тупраҡ шул тиклем яҡшы, бында эшләргә лә эшләргә. Йыйылғанды Аҡкүл элеваторына ебәрәбеҙ, унда орлоҡтар киптерелә, таҙартыла. Артабан май эшләү заводына оҙатыла, - тине хужалыҡ агрономы Владимир Никитин.
Уның һүҙҙәре буйынса, бында эш тәүлек әйләнәһенә дауам итә. Аграрийҙар аяҙ көндәрҙе файҙаланып, көнбағыш йыйыуҙы тамамлаған да инде. Уңыш нигеҙе – тырышлыҡ. “Уңыш”тар ошо һүҙҙәрҙе девиз итеп эшләй һәм алға бара.
Эльнара Шаймарҙанова фотоһы.