“Пенек” салатын эшләгәнегеҙ бармы?

 Оҙайлы Яңы йыл байрамы уңған хужабикәләргә яҡындарын рәхәтләнеп төрлө ризыҡтар менән һыйлау мөмкинлеген бирә. Ишембай районынан Сәлимә Герасименко “Башҡортостан” гәзите уҡыусыларын үҙенсәлекле салат эшләргә өйрәтә. Һүҙҙе уға бирәйек.

-Яҡынса бер күләмдә бешкән бәрәңгене, кишерҙе, йомортҡаны  таҙартып, шулай уҡ сырҙы  эре ҡырғыс аша үткәрәм. Маринадланған баллы бәшмәкте (опята) ваҡ ҡына итеп турайым.  Артабан ҡоймаҡ өсөн ҡамыр әҙерләйем. Бының өсөн 3-4 йомортҡа, һөт, тоҙ, он ҡушып шыйыҡ ҡына ҡатнашма эшләйем, матур төҫ бирһен өсөн куркума ла ҡушып ебәрәм. Йоҡа ғына итеп ҙур булмаған ҡоймаҡтар бешергәс, уларҙы таҡтаға бер-береһен яртылаш ҡаплап оҙон итеп теҙәм, бер-береһенә тейгән урындарын иретелгән сыр менән  йәбештерәм. Оҙон бер яғын тигеҙләп ҡырҡам. Һуңынан ҡоймаҡ өҫтөнә  буйҙан -буйға рәтләп  бәрәңге,  бәшмәк, кишер, йомортҡа, сырҙы һалам һәм , төргәк итеп урайым. Төрөлгән ҡоймаҡты тигеҙ яғы менән  тәрлинкәгә ултыртып ҡуям. Өҫкө яғын укроп, бәшмәк менән биҙәп ебәрәм, тәмле лә, матур ҙа килеп сыға, - тип һөйләне уңған ханым.

Фото: Сәлимә Герасименконыҡы.