Тыуған яҡтан – ҡайнатмалар!

Мәҫәлән, ошо көндәрҙә штабтағы ҡатын-ҡыҙҙар һуғыш яланында йөрөгән яугирҙәрҙе тыуған яҡ яландарында бешкән ер еләге ҡайнатмалары менән ҡыуандырырға булды.

• Тыуған йорттарынан алыҫта өй ризыҡтарын һағынып йөрөгән ир-егеттәребеҙгә татлы ҡайнатмалар яһап ебәрергә һөйләшеп килештек тә, яланға еләк йыйырға сығып та киттек. Үҙ-ара һөйләшеп, йәйге тәбиғәткә һоҡланып тиҙ арала күнәктәребеҙҙе тултырып ҡайттыҡ. Тәмле хуш еҫле еләктәрҙән 40 банка ҡайнатма эшләп, тыштарына матур итеп яҙыу йәбештереп, яҡташтарыбыҙға ебәрергә әҙерләп тә ҡуйҙыҡ. Яугирҙәребеҙ уларҙы сәйҙәренә ҡушып эсеп, көс-ҡеүәт алһын, тыуған яҡтарын иҫтәренә төшөрһөн.

Бының менән генә туҡтап ҡалмаҫҡа уйлайбыҙ. Йәй мәлен файҙаланып, миндек, мәтрүшкә, кейәү үләне, иван-сәй һәм башҡа дарыу үләндәрен дә йыйып ебәрергә уйлайбыҙ, - ти штаб етәксеһе Резеда Әхтәмова.

Ирекмән-ҡатын-ҡыҙҙар “Ер еләге, дарыу үләндәре һәм миндек” акцияһына   башҡа райондаштарыбыҙҙы ла ҡушылырға саҡыра. Күмәкләгән – яу ҡайтарған, тиҙәр, әйҙәгеҙ дәррәү генә яугирҙәребеҙгә татлы күстәнәстәр әҙерләп алайыҡ, - ти улар.

Гөлсәсәк Аласова.