Гөлгөнә Байегетова ҡарағат бәлеше бешерергә өйрәтә

Баймаҡ районынан Гөлгөнә Байегетова бешергән тәмлекәстәрҙе һәр кем ярата, уларҙың рецептарын һорап ала. Оҫта был юлы ҡарағат бәлеше бешереү серҙәрен  уртаҡлашҡан.

"Ҡара ҡарағаттан заливной бәлеш бешерҙем. Эслеге тәмле генә, ҡарағаттың әскелтем тәмен биреп тора, ә ванилин ҡушып та ебәргәс инде... телеңде йоторлоҡ булды, бәлеш ялп итеп тә ҡалды! 
Ҡамыры:
2 стакан онға 0.5 сәй ҡалағы сода һалып, ярты стакан шәкәр ҡомона бер йомортҡа ҡушып болғатып, шуны онға ҡушып, 200 грамм  маргарин менән баҫтым.
Эслеге:
Минең бәлеш ҙур булғас, күберәк эшләнелде: ике стакандай магазин ҡаймағына ярты стакан шәкәр ҡомо, 1 сәй ҡалағы ванилин, 1 йомортҡа, 2 аш ҡалағы крахмал ҡушып бөтәһен дә яҡшы итеп болғатып, табаға йәйелгән ҡамыр өҫтөнә ҡойолдо. Өҫтөнә ҡарағаттар һибеп сыҡтым. Ҡыҙыу духовкала 45 минут тирәһендә бешереп алдым. Һыуытып ашар кәрәк был бәлеште", - тип яҙған ул.

Һеҙ ҙә бешереп ҡарағыҙ әле! Ашығыҙ тәмле булһын! 

Фото һәм сығанаҡ: Гөлгөнә Байегетованың социаль селтәрҙәге сәхифәһенән.