Дөрөҫ файҙаланыу мөһим

Помидор составындағы ликопин антиоксиданттары яман шеш, атеросклероз, тамырҙар елһенеүе ауырыуҙарын иҫкәртеү,  дауалау сифатына эйә. Помидорҙа А витамины күп, ул яман шеш таралыуының иң зарарлы факторы – ирекле радикалдарҙан һаҡлай.

Брокколи составында сульфорафон тигән матдә күп, ул зарарлы бактерияларҙы үлте­реп, ашҡаҙанды гастрит, сей яра (язва) сирҙәренән, рак кү­ҙәнәктәренең үҫешенән һаҡлай, шулай уҡ иммунитетты нығы­тыусы туҡлыҡлы матдәләргә бай.

Брюссель кәбеҫтәһе фолий кислотаһына бай, шуға күрә ауырлы ҡатындар өсөн бик файҙалы. Составында В-төркөмөнә ингән витаминдар ҙа күп, Омега-3 тире торошон, мейе эшмәкәрлеген яҡшырта.

Кишер – антиоксидант һәм А витамины сығанағы. Күреү һәләтенә, тышҡы ҡиәфәткә яҡшы тәьҫир итә.

Ҡабаҡ йөрәк өсөн файҙалы магний менән калийға бай. Сос­тавында күҙәнәкле туҡыма­ларҙың күп булыуы организмдан холестеринды сығарыуға булышлыҡ итә. Күҙҙәр, тире, бауыр өсөн файҙалы, сәс ағарыуын тотҡарлай.

Татлы борос аскорбин һәм фолий кислоталарына, анти­ок­сиданттарға  бай. Ҡыҙыл төҫтәге сорттары бигерәк тә файҙалы: хром – шәкәр диабетынан, ликопин – яман шештән, аш сүстәре организмды атеросклероздан һаҡлай.

Баклажан организмдан холестеринды, артыҡ шыйыҡ­саларҙы сығарыуға булышлыҡ итә, шулай уҡ составындағы калий, күҙәнәкле туҡымалар йөрәк эшмәкәрлегенә ыңғай йоғонто яһай.

Шпинат туҡлыҡлы матдә­ләргә бик бай. Ашҡаҙан-эсәк системаһы, шайыҡ биҙҙәре өсөн файҙалы. Күреү функцияларын нығыта.

Һуған остеопороздан фай­ҙалы, диабет, тамырҙар елһе­неүе ауырыуҙарын иҫкәртә.

Ҡыҙыл сөгөлдөр тимергә, баҡырға һәм В төркөмө витаминдарына бай, шуға күрә ҡанда гемоглобин кимәлен нормала тотоуға булышлыҡ итә, ҡан баҫымын төшөрә. Ашҡаҙан-эсәк системаһы эшмәкәрлеген көйләй.

Римма СОЛТАНОВА