Ҡый үләне тип ташларға ашыҡмағыҙ

Ҡый тип йолҡоп ырғытҡан күп үләндәрҙең ни тиклем файҙалы булыуы, күп ауырыуҙарҙан килешеүе тураһында тағы бер ҡат иҫегеҙгә төшөрөргә булдыҡ. Һәр кемдең баҡсаһында бәпембә, аҡтамыр, дегәнәк үҫәлер. Саҡ ҡына ҡарамағанда ла, баҫып алып ҡына бара улар, шулай бит?!

Ә бит элек-электән был үҫемлектәрҙең дауалау үҙенсәлектәре тураһында белеп ҡулланғандар, аслыҡ йылдарында тамырҙарынан он тартып, икмәк итеп тә ашағандар.

Мәҫәлән, аҡтамыр организмда матдәләр алмашыныуын яйға һала, тамырынан төнәтмә шешенгәндә, бәүел тотмағанда, хроник бронхит, цистит, ашҡаҙан-эсәк, шәкәр диабеты, юғары ҡан баҫымы, остеохондроз сирҙәре булғанда килешә. Быуындар һыҙлағанда ауырты­ныуҙы баҫыу өсөн дә ҡулланырға мөмкин.

Бәпембә тамырының аҙ ҡанлылыҡты, ашҡаҙан, бауыр, диатез, быуын сирҙәрен дауалау һәләте бар.

Дегәнәк тамыры ла бик күп сирҙән – бронхит, гайморит, ревматизм, подагра, артрит, атеросклероз, умыртҡа һөйәге бүҫере, тире ауырыуҙарынан, хатта яман шештән дә дауа сығанағы булып тора.

Үҫемлек тамырҙарын иртә яҙ һәм йәй миҙгелендә ҡаҙып алыу мөһим. Дауаланыу өсөн бер-ике йыллыҡтарын, хәлдәрен сәскә атыуға ебәрмәгән йәш, көслө үләндәрҙе һайларға кәрәк.

Тамырҙарҙы ҡаҙып алғас, таҙартып, йыуып, ҡоротоп, ваҡлап турарға (оҙаҡҡа һаҡлағанда – киптерергә). Дауа сифатында ҡулланғанда, бер ҡалаҡ тамырҙы ике стакан эҫе һыулы һауытҡа һалып, тағы ун минут ҡайнатырға ла ике сәғәткә ултыртып торорға кәңәш ителә. Ашарҙан ун-ун биш минут алда көнөнә өс тапҡыр ярты стакан эсеү һөҙөмтәле буласаҡ.

Һәр сараны ҡулланыр алдынан табип менән кәңәшләшергә онотмағыҙ.

 - Ә. ҒИЗЗӘТУЛЛИНА.

https://bashgazet.ru/articles/s-l-m-t-bulayy/2021-07-30/yy-l-ne-tip-tashlar-a-ashy-ma-y-2446089