Водитель дә, мышы ла һәләк булған

Фажиғәле осраҡ бөгөн таң менән теркәлә.Тулы текст сайтта:

Бөгөн таң менән Архангел районында үлемесле авария теркәлде. ЮХХДИ-ның матбуғат хеҙмәтенән хәбәр итеүҙәренсә, Өфө – Инйәр – Белорет автомобиль юлының 46-сы километрында машина мышыға бәрелә. Билдәле булыуынса, “Лада Ларгус” автомобиленә 49 йәшлек Ырымбур өлкәһе кешеһе идара иткән. Машина ҡапыл юлға килеп сыҡҡан мышыға төкөлә, бынан һуң юлдан оса һәм түңкәрелә.

Тиҙ арала килгән “Ашығыс ярҙам” табиптары ирҙе дауаханаға алып китеп барған саҡта ул йән бирә. Мышы шулай уҡ авария урынында һәләк була. Әле был ваҡиға буйынса тәфтиш-оператив төркөм тикшереү башлаған.

Ҡыҙғанысҡа ҡаршы, көндәр йылытҡас ошондай авариялар арта. Ҡырағай йәнлектәргә бәрелеп кешеләр ҙә, йәнлектәр ҙә әрәм була. Уларға юл ҡуймауҙың юлы бер: барлыҡ ҡағиҙәләрҙе үтәп, тиҙлекте арттырмай ғына йөрөү.

Фото: ЮХХДИ.