Ҡаҙҙар күпләп үлгән

Стәрлебаш районының Түбәнге Аллағыуат ауылында 100 башҡа яҡын ҡаҙ һәм тауыҡ үлгән. Был хаҡта социаль селтәрҙә Данир Ғәйнуллин хәбәр иткән. Уның белдереүенсә, ҡоштар көҙ башында үлә башлаған. “Шуныһы ҡыҙыҡ: кем Ашҡаҙар йылғаһы үҙәнендә йәшәй, шунда. Ә йылға аҡҡан урында был процесс күҙәтелмәй”, – тип яҙған ул.

Башҡортостандың Ветеринария хеҙмәтендә был хәлгә түбәндәге аңлатманы биргәндәр: “Стәрлебаш районының Түбәнге Аллағыуат ауылында 110 ихата бар, уларҙа 1050 баш ҡош-ҡорт иҫәпләнә. Ҡаҙҙарҙың үлеме буйынса ветеринария хеҙмәтенә мөрәжәғәт итеү булған. Ошонан һуң патологик материал алынған, ул “Башҡорт ғилми-етештереү ветеринария лабораторияһы” дәүләт бюджет ойошмаһының Стәрлетамаҡ филиалына ебәрелгән. Тикшереүҙәр һөҙөмтәләре буйынса, 12 октябрҙәге экспертизаға ярашлы, килтерелгән өлгөләрҙә колибактериоз һәм аспергиллез ҡуҙғытҡыстары – ҡош-ҡорттоң эсәк-ҡарын һәм бәшмәк ауырыуҙары инфекциялары – булған. Шуға ла ҡаҙҙар үлгән”.

"Стәрлебаш район дәүләт ветеринария хеҙмәте вәкилдәре 7 декабрҙә урынға сыҡҡан һәм ҡош-ҡортто ҡараған, фермерҙар менән аралашҡан. Сир билдәләре асыҡланмаған”, – тип хәбәр иткән Башҡортостан Ветеринария идаралығының рәсми вәкиле Рәзинә Шәрипова.

Хәтерегеҙгә төшөрәбеҙ, ноябрь урталарында Башҡортостан сигендә, Баҡалы районынан биш километр алыҫлыҡта, ҡош киҙеүенең көсәйеүе хаҡында хәбәр иткәйнек.

Фото: 7kyr.ru

Автор: Айһылыу Низамова