Спорт майҙансығы буласаҡ

- Алты йыл рәттән был программала ҡатнашабыҙ. Ҡәҙерле яҡташтарым, ошо программа һәм һеҙҙең ярҙам менән МТЗ- 82 тракторы алыуға ирештек, Арыҫлан һәм Яңы Муса ауылдары урамдарын яҡтыртыуҙы тергеҙҙек, Аҡкүл ауылы зыяратын төҙөкләндерҙек, Иҫке Муса ауылының социаль объекттарына инеү мөмкинлеген булдырҙыҡ. Яҡташтарым быйыл да “Урындағы башланғыстарҙы хуплау” программаһында ҡатнашырға ҡарар итте. Халыҡтан һорау алыуҙа, алдан уҙғарылған йыйылыштарҙа ике тәҡдим индерелде – Иҫке Муса ауылы урамдарын яҡтыртыуҙы тергеҙеү һәм спорт майҙан­сығын төҙөкләндереү. Йомғаҡлау йый­ылышында заманса спорт майҙансығын төҙөкләндереү өсөн бер тауыштан ҡарар ҡабул ителде. Ауыл балалары араһында спортҡа ҙур ҡыҙыҡһыныу күҙәтелә һәм шуның өсөн дә ата-әсәләр был ҡарарҙы хуплап ҡабул иттеләр, - тине Иҫке Муса ауыл Советы хакимиәте башлығы Илми­ра Ғәлиәхмәтова.

 “Урындағы башланғыстарҙы хуплау” программаһы сиктәрендәге был про­ект үҫеп килгән быуындың үҫеше һәм сәләмәт тормош рәүешен пропаганда­лауҙа яҡшы шарттар булдырыу өсөн ха­лыҡтың ынтылышын сағылдыра.

Фекер алышыу барышында был про­ектҡа финанс ярҙам күрһәтеү өсөн ха­лыҡтан һәм иғәнәселәрҙән 10-шар про­цент финанс ярҙам күрһәтеү ҡарары ла ҡабул ителде.

Илшат Ғәлиәхмәтов, Миләүшә Мөхәмәтйәрова, Рәмзиә Ҡунаҡаева, Гөл­шат Шәңгәрәева, Гөлнара Шәғәлиева, Заһит Әмировтарҙан торған инициатив төркөм һайланды. Улар ауыл Советы ха­кимиәтенә конкурс документтарын әҙер­ләшергә, проектҡа финанс ярҙам күрһә­теү өсөн халыҡтан һәм иғәнәселәрҙән аҡса йыйырға, проект буйынса эш ба­рышын күҙәтергә һәм халыҡҡа хәбәр итеп тороу эштәрен башҡарасаҡ.

Әлиә ЮЛЫЕВА.