Салауат һәм Рәми эҙҙәре буйлап...

Иртәгә – Бөтә донъя туризм көнө

Салауат һәм Рәми эҙҙәре буйлап...

Бөтә донъя туризм көнө уңайынан күптән яҙырға теләп тә, ваҡыт еткерә алмай йөрөгән темаға тотонорға форсат тейҙе.

 Быйылғы йәйҙең иң эҫе көн­дәренең береһендә, 16 июндә, республикала Салауат Юлаев­тың 270 йыллығы билдәләнгән көндә, милли батырыбыҙҙың тыуған яғында – Салауат райо­нының Тәкәй ауылы урынында “Салауат ере” тарихи-мәҙәни комплексын асыу тантанаһына шаһит булырға тура килде. Тан­танала Башҡортостан Башлығы Радий Хәбиров ҡатнашты.

Республикабыҙҙың хозур тә­биғәтен күҙәтә-күҙәтә байрам үтә торған майҙанға аяҡ баҫыу менән беҙҙе йәмле Йүрүҙән йылғаһы ҡаршы алды. Шун­да уҡ эстән генә “Йүрүҙән, Йүрүҙән, күпте күргән, күп­те кисергән” йырын һуҙып та ебәрҙем. Шулай уҡ ошо ерҙә ты­уып үҫкән мәшһүр шағир Рәми Ғариповтың “Йүрүҙән” шиғы­ры ла иҫкә төштө.

Белеүебеҙсә, Салауат ере арҙаҡлы шәхестәргә бай төбәк: милли батырыбыҙ Салауат Юлаев, йор һүҙле Байыҡ сәсән һулаған һауаны һулап, улар йөрөгән һуҡмаҡтарҙан йөрөп, улар эскән Йүрүҙән һыуҙарын эсеп үҫкән шағир Рәми Ғарипо­втың тормошо ла беҙгә үрнәк.

Эйе, Рәми Ғариповтың да балалыҡ йылдары ошо матур Йүрүҙән буйында үткән. Уның ошонда аттар көткән, бесән сапҡан, урып-йыйыу эштәрен­дә ҡатнашҡан, урман йыҡҡан, Йүрүҙән буйлап һал ағыҙған саҡтары бер-бер артлы күҙ ал­дына баҫты. Ә саҡ ҡына эштән бушаған арала ул китаптарға тотонған. Тәүге шиғырҙарын да яратҡан йылғаһы Йүрүҙәнгә, бала сағына, әсәһенә, атаһына, туғандарына бағышлаған.

Әйткәндәй, «Салауат ере» комплексының дөйөм майҙаны – 4,5 гектар. Был архитекту­раһы, күләме һәм дизайны буй­ынса үҙенсәлекле булған тари­хи парк. Проект концепцияһы Мостай Кәримдең “Салауат. Өн аша ете төш” әҫәре нигеҙен­дә эшләнгән. Салауат Юлаев иҫтәлектәренең образдары парк майҙанында тематик лекциялар булараҡ асыла. Уларҙың һәр бе­реһе шағир тормошоноң мөһим этаптарын кәүҙәләндерә. Кон­цепцияны әҙерләгәндә урын­дағы тәбиғәтте һаҡлап ҡалыу мотлаҡ шарт булып торған. Йыл һайын ошо гүзәл тәбиғәт мөй­өшөнә 17 меңдән ашыу турист килә. Республиканың Эшҡыу­арлыҡ һәм туризм министрлығы хәбәр итеүенсә, парк асылғас, уларҙың һаны бер нисә тапҡы­рға артыр тип көтөлә.

Данлыҡлы “Салауат йый­ыны” һәм “Ҡурайсылар съе­зы”нда ҡатнашыуыма, илһөйәр Салауатты, хаҡлыҡ өсөн көрә­шеүсе Рәмиҙе биргән ҡотло ергә сәйәхәт ҡылыуыма ҡыуанып бөтә алмайым һәм һеҙгә лә ба­рып күрергә тәҡдим итәм.

  “Халыҡты тарихи ваҡиғалар ҙа һәм, әлбиттә, тәбиғәт тә ылыҡтыра. Бында бөтәһе лә органик рәүештә берләшкән. Был ерҙә элек Салауат Юлаев тыуып үҫкән ауыл урынлашҡан. Милли геройыбыҙҙың Башҡор­тостан өсөн ниндәй әһәмиәтле булыуын ба­рыһы ла белә. Салауат Юлаев яугир генә тү­гел, ижади кеше лә булған, шиғырҙары тәрән мәғәнәгә эйә. Бында һеҙ уның тормош юлы һәм ижады менән таныша алаһығыҙ. Сала­уат районы – күркәм тәбиғәт ҡосағында урынлашҡан. Беҙ бында туристарҙы саҡыра­быҙ. “Салауат ере” комплексын асыу – ошо биләмәне, дөйөм алғанда, Башҡортостан­дың төньяҡ-көнсығышын үҫтереүҙәге мөһим аҙым. Был урын һәр кемдең күңеленә хуш ки­лер, тип ышанам”, – тине Радий Хәбиров музей комплексы асылыу тантанаһында һәм геопарктарҙы үҫтереү буйынса киң мәғлүмәт кампанияһын ойошторорға, «Салауат ере» комплексын «Башҡортостанда оҙон ғүмерле­лек» программаһына индерергә ҡушты.

 Имза БИКТИМЕРОВ, йәмәғәтселек фекере лидеры:

- Шәхсән үҙем һәр ваҡыт Башҡортостанда ял итергә, республикабыҙ буйлап сәйәхәт ҡылырға яра­там. Беҙҙә ял итеү базалары ифрат күп. Тыуған яҡтарыбыҙҙың хозур тәбиғәте кемдәрҙе генә үҙенә йәлеп итмәй?!

Рәсәйҙә, шул иҫәптән, Башҡортостанда эске туризм бик яҡшы үҫешә. Кешеләр уңайлы мөхиттә ғүмер итһен, ялдарын файҙалы уҙғарһын өсөн Башҡортостан Башлығы Радий Хәбиров тарафынан бихисап проекттар уңышлы тормошҡа ашырыла. Уның билдәләүенсә, Башҡортостандың уникаль ту­ристик потенциалы бик ҙур. Эйе, туризмды үҫтереү – ул республикабыҙҙың киләсәге өсөн инвестиция! Шуға күрә лә был өлкәнең үҫеше буйынса эштәр эҙмә-эҙлекле алып барыла ла инде.

Розалия НАЗАРОВА.

Автор фотоһы.