Ике яңы объект хасил булды

Хәтер таҡтаһын, балалар майҙансығын асыу һәм бай­рам ойоштороу өсөн Күлләр ауылы халҡы ҙур көс һалған. Тантанаға ауыл халҡы ғына түгел, сит яҡтарҙа йәшәгән яҡташтар һәм ҡунаҡтар ҙа саҡырылған ине. Сараны Ефремкин ауыл советы ха­кимиәте башлығы Наталья Иванова асты һәм:

- Ошо тантаналы минут­тарҙы кисерер өсөн беҙгә бер йылдан ашыу көс түгергә тура килде. Бөгөнгө эш һөҙөмтәһе – барлыҡ Күлләр ауылы халҡының дөйөм ҡаҙанышы. “Айыҡ ауыл” бәйгеһен­дә еңеп сығыр өсөн ауылда бик күп саралар уҙғарылды. Унда барыһы ла әүҙем ҡат­нашты. Ысынында иһә, был балалар майҙансығы күпкә ҡыйбатыраҡ тора. Беҙҙең хәлгә кереп, ошо эштә оло ярҙам күрһәтеүсе эшҡыуар Дамир Насировҡа рәхмәт­лебеҙ. Хәтер таҡтаһындағы исемлекте төҙөүҙе үҙ өҫтөнә алған яҡташыбыҙ Юлай Әб­сәләмовҡа һәм барлыҡ ауыл халҡына рәхмәтем сикһеҙ, - тине.

Эйе, Күлләр ауылында тыуып үҫкән, Тарих, тел һәм әҙәбиәт институты хеҙмәт­кәре Юлай Әбсәләмов хә­тер таҡтаһында мәңгелеккә уйылып яҙыласаҡ исемлек өҫтөндә ҙур эш башҡарған. Оло йәштәге яҡташтары менән әңгәмәләшкәндән, тарихи китаптарҙы өйрән­гәндән, күп тапҡырҙар хәрби комиссариат тупһаһын та­пағандан һәм архивта эҙлән­гәндән һуң Юлай Марат улы 96 яугирҙән торған исемлек төҙөй.

Байрам ҡунағы, район хакимиәте башлығы­ның эшҡыуарлыҡ буйынса урынбаҫары Рәсил Исламов Юлай Марат улына район хакимиәтенең Рәхмәт хатын тапшырғандан һуң:

- Күлләр ауылы минең тыуған ауылым кеүек. Бе­леүегеҙсә, минең өләсәйем ошо ауыл клубында эшлә­не. Ошондай ҙур эш атҡа­рып сыҡҡанығыҙ өсөн ба­рығыҙға ла рәхмәтлемен. Күлләр ауылы халҡы һәр ваҡыт үҙҙәренең маҡсатҡа ирешеүсәнлеге, әүҙем һәм татыу булыуҙары менән айырылып тора. Һеҙ бер нимәнән дә ҡурҡып тормай­ынса алға табан барҙығыҙ һәм оло маҡсатҡа ирештегеҙ. Ауыл халҡын дәртләндереп, идеялар биреп һәм алға әй­ҙәп тороусы ауыл советы ха­кимиәте башлығы Наталья Ивановаға һәм ауыл старо­стаһы Римма Сөләймәно­ваға, оло ярҙам күрһәтеүсе Дамир Насировҡа, Юлай ағайға рәхмәт. Балалар май­ҙансығы һәр саҡ кескәй­ҙәрҙең күңелле тауышынан гөрләп торор, тип ышанам, - тигән һүҙҙәрен еткерҙе.

- Ошондай мөһим про­ектты бойомға ашырыуҙа әүҙем ҡатнашҡан Күлләр ауылы халҡына рәхмәт әй­тәм. Тыныс тормош өсөн көрәшкән һәм баштарын һалған яҡташтарыбыҙ беҙҙең хәтерҙә мәңге йәшәйәсәк, - тине үҙенең сығышында Юлай Марат улы.

Бер минутлыҡ тынлыҡ менән һуғыш ҡорбандарын хәтергә алыу, ҡыҙыл таҫма­ларҙы киҫеп, рәсми рәүештә стеланы асыу, ауыл халҡы һәм мәктәп уҡыусылары, Алайғыр ауылының “Зәй­түнгөл” ансамбле әҙерлә­гән күңелдәргә үтеп инер­лек концерт программаһы, ауылдаштарҙың хәтирәләре менән бүлешеүҙәре бер кем­де лә битараф ҡалдырманы.

Ике ҙур объектты асыу тантанаһы һуңында кескәй­ҙәр өсөн яңы асылған бала­лар майҙансығында күңелле уйындар, ололар өсөн бай та­бын артында сәй эсеү ойошторолдо.

Розалия БИКТИМЕРОВА.

Автор фотолары.