Ысын батырҙар Үтәгәндә йәшәй!

Ысын батырҙар Үтәгәндә йәшәй!

 “Айыҡ ауыл” республика конкурсы сиктәрендә Ғафури районында үт­кән «Многоборье» ярышында ҡатнашып, үтәгәндәр командаһы лайыҡлы рәүештә Гран-при яуланы.

Сәләмәт тормошто пропа­гандалау, милли һәм халыҡ спор­ты төрҙәрен популярлаштырыу, спортсыларҙың таһыллығын арттырыу һәм улар араһынан иң көслөләрҙе билдәләүҙе маҡ­сат итеп ҡуйған бәйгелә Ил­фат Хәсәнов, Илнар Мәһәҙи­ев, Рамаҙан Хөсәйенов, Гимназ һәм Зәбир Баһауетдиновтарҙан торған команда көс һынашты.

“Спортсы” тиһәк, күҙ алды­на даими рәүештә спорт менән шөғөлләнеүсе кеше күҙ алды­на баҫа. Ҡыҙғанысҡа, беҙҙең ир-егеттәрҙең ундай мөмкин­леге юҡ. Мәҫәлән, Баһауетди­новтар производствола хеҙмәт итә. Икеһе лә ғаиләләрендә дүртешәр бала тәрбиәләй, күп итеп мал аҫрай. Өс бала атаһы – Илфат Хәсәнов алыҫ Себерҙә вахта ысулы менән эшләй, йорт һала. Илнарыбыҙ күптән тү­гел генә махсус хәрби операция биләмәһенән ҡайтһа, коман­даның иң йәш ағзаһы Рамаҙан – буласаҡ агроном, Башҡорт дәүләт аграр университетын та­мамлай.

Шулай итеп, Үтәгән ауылы батырҙары бәйгенең биш һына­уын да лайыҡлы үтеп, үҙҙәренең көсөн, сыҙамлығын һәм оҫта­лығын күрһәтә алды. Ауырғазы, Архангел һәм Ғафури районда­рын артта ҡалдырып, улар Гран- при яуланы. Үҙҙәренә бүләк ителгән термопотты ауыл мәсе­тенә бирергә ҡарар итте ауыл­даштар.

Беҙ яҡташтарыбыҙ менән сикһеҙ ғорурланабыҙ һәм оло еңеүҙәре өсөн бөтмәҫ-төкән­мәҫ ҡыуаныс хистәре кисерәбеҙ. Уларҙың махсус рәүештә әҙерлә­нергә мөмкинлектәре лә булма­ны, шуға ҡарамаҫтан, маҡсат­тарына ирештеләр һәм абсолют еңеүсе булдылар. Урал батыр, Абдрахман батыр, Шайморатов генерал вариҫтары, ысын батырҙар беҙҙең Үтәгәндә йәшәй!

Дилара ҠОҘАЙҒОЛОВА,

Үтәгән ауылы старостаһы.