Бөгөн билдәле блогер, яҡташыбыҙ Рөстәм Нәбиев сираттағы ҙур бейеклекте яуланы – Африкалағы Килиманджаро тауына ике ҡулында менә алды. Был турала ул телеграм-каналында яҙҙы.
“Кешегә ҡуйған маҡсатына өлгәшеү өсөн нимә кәрәк? Теләк, илһам, ихтыяр көсө генә етәме, әллә ни бары хәрәкәт итеү генә кәрәкме? 8 декабрҙә 4.30 сәғәттә мин үҙ ҡулдарымда Африка континентының иң бейек нөктәһе Килиманджароға (5895 метр) менеп еттем. Дөйөм алғанда, 50 километр ара үттем.
Дөрөҫөн әйтәм, был тау минең өсөн ауыр түгел, ә НЫҠ АУЫР булды. Шулай ҙа, бер нәмәгә лә ҡарамай, флагыбыҙҙы иң юғары нөктәгә ҡаҙай алдым.
Мин, Рөстәм Нәбиев, сираттағы тапҡыр бар донъяға ҡанатһыҙ ҙа осоп булғанын дәлилләгән кешемен. Иң мөһиме - дөрөҫ бейеклекте һайларға кәрәк”, – тип яҙҙы яҡташыбыҙ.
Был ваҡиға уңайынан уны Башҡортостан Башлығы Радий Хәбиров та ҡотланы. “Рөстәм Нәбиев Рәсәйҙең иң юғары нөктәһен – Эльбрусты һәм Непалдағы Манаслу тауын яуланы. Әле ул Килиманджароға ла барып етте. Ҡаһарманлыҡ һәм башҡаларға күрһәткән лайыҡлы миҫалың өсөн рәхмәт!" - тип яҙҙы республика етәксеһе.
Беҙ ҙә Рөстәм Нәбиевте ихлас ҡотлайбыҙ!
Фотолар Р. Нәбиевтең телеграм-каналынан.