Йәне сәләмәттең тәне лә сәләмәт

Азат Әнәс улы бәләкәйҙән спорт­ты ярата, санала шыуа, саңғыла йөрөй, сальто яһап, шпагатҡа ултыра. Үҫмер саҡта баскетбол, бокс түңәрәктәренә әүҙем йөрөй. Мәктәпте тамам­лағас, армияға тиклем Ҡабаҡ кирбес заводында слесарь яр­ҙамсыһы булып эш­ләй. 18 йәше тулғас, хәрби хеҙмәткә саҡы­рыла.
- Армияға барырға теләгем ҙур ине. Повестканы түҙем­һеҙ­лек менән көтөп алдым. Ставрополь крайында учебка үткәндән һуң, Төньяҡ Кавказдың Железноводск махсус тәғәйенелештәге сик буйы отрядына ебәрелдем. Шулай икенсе Чечен һуғы­шын­да ҡатнашырға тура килде. Артабан Дағстанда, Чечен Рес­­пуб­ликаһы сигендә хәрби хеҙмәтте дауам иттем, - тип үт­кәндәр тура­һында һөйләп алды ул.
Ил алдындағы бурысын үтәп ҡайтҡас, Өфөгә эшкә урынла­ша. Әле­ге көндә керамзит заводында эшләй. Баш ҡалаға эшкә йөрөһә лә, үҙе йә­шәгән билә­мәләге йәмәғәт эштәренең ур­таһында ҡайнай: спорт ярыш­тары булһынмы, ойоштороу тиһеңме – һәр береһендә ихлас ҡатнаша. Спортты һөйгән ир йыл һайын катокты эш­ләүҙе ойоштора, үҙе лә ең һыҙғанып башҡалар менән бергә эшләй. “Беҙҙең хоккей командаһы бар. Егеттәрҙе бер төрлө формала йөрөткө килде. Шуға ла ярҙам­сылар, иғәнәселәр менән һөй­ләштем. Улар ярҙамында хок­кей­­сыларға кейемдәр булдырылды. Шулай, эшҡыуар Эрнст Яхин бер төрлө спорт майкаларын алып бирһә, ауыл Советы форма һатып алды, ә “Салауат Юлаев” хоккей клубы тотонолған һаҡлау сараларын бирҙе.
Азат Ғәниевтың физкультура буйынса махсус белеме булмаһа ла, үҙе лә спорт менән әүҙем шөғөлләнә, үҙ артынан эйәртә лә ала. Ойоштороу һә­ләтле, һәр кем менән уртаҡ тел тапҡан ир төрлө спорт ярыштары ойош­тороу­ҙы ҙур теләк менән баш­ҡара. Хоккей, мини-футбол, во­лейбол ярыштары ла уның ҡатнашлығынан башҡа уҙмай, тиһәң дә була. Районда ғына түгел, ял көндәрендә Өфөнөң LigaFull һәүәҫ­кәрҙәрҙең футбол лигаһына күнек­мәләргә бара, ярыштарҙа ҡатнаша. Ҡабаҡта иһә күнекмәләргә кистәрен аҙ­наһына өс тапҡыр йөрөй. Бәйге­ләрҙә ул ҡатнашҡан командалар призлы урындар алыуға ла ире­шә. “Ярыштарҙа ҡатнашыуым сәләмәт йәшәү рәүеше өсөн бул­һа ла, әлбиттә, еңеүҙәр дәрт­ләндерә”, - ти ул.
Спортты юлдашы иткән Азат Әнәс улы хатта эштәге төшкө аш ваҡытында ла теннис уйнарға ваҡыт таба икән. Уның һүҙҙәре буйынса, спорт менән шөғөл­ләнеү һаулыҡтың нигеҙе, ул ял һәм рәхәтлек бирә. Спорт тәнде лә, рухты ла нығыта, ныҡыш­малылыҡҡа өйрәтә, ихтыяр көсө тәрбиәләй.
Ғәилә башлығы үҙ өлгөһөндә ғаиләһен дә спортҡа ылыҡты­рырға тырыша. Һөнәре буйынса инглиз теле уҡытыусыһы булған ҡатыны Ольга Николаевна буш ваҡыттарында волейбол уйнарға ярата. Балалары ла спортты үҙ итә: 9-сы класта уҡыған улдары Ильяс ҡатнаш көрәш менән шө­ғөл­ләнә, яулаған миҙалдары ла бар, ә 3-сө класта уҡыусы ҡыҙ­ҙары Самира гимнас­тикаға йөрөй.
- Балалар сәләмәт булып үҫ­һен өсөн бәләкәйҙән спорт­ҡа ылыҡты­рырға кәрәк. Үҫмер саҡ­тан спорт ме­нән дуҫ булыуым арҡаһында мин үҙем­де яҡшы тоям, һәр саҡ кәйефем яҡшы. Спиртлы эсемлектәр эсмә­йем, тартмайым, тик сә­ләмәт йәшәү рәүе­ше яҡлымын. Ғаилә дуҫ­тарыбыҙ ҙа ошон­дай. Яңы йыл байрамдарын уҙ­ғар­ғанда өҫтәлгә шампан шарабы ла ҡуй­майбыҙ. Спиртлы эсемлек ҡул­лан­ма­һаҡ та, ҡунаҡтарҙа күңелле улты­рабыҙ, бейейбеҙ, йырлайбыҙ. Кон­церттарға ла йөрөргә яратам, - тип һөйләне ул.
Чеченсы, сик буйы ғәскәр­ҙәрендә хеҙмәт итеүсе булараҡ, иптәштәре менән осрашыуҙарға йөрөй, һәйкәл­дәр асыуҙа ихлас ҡатнаша. Ҡабаҡ ауылында сик буйы ғәскәрҙәренә һәйкәл асыуға ҙур тырышлыҡ һала.
Әлеге ваҡытта оҫта ҡуллы ир үҙҙәренә яңы йорт төҙөү менән мәшғүл. Ламинат, йылы иҙән түшәү эштәрен үҙе башҡара. Егет кешегә етмеш төрлө һөнәр ҙә аҙ тигән мәҡәл тап уға тура килә кеүек.
Азат Ғәниевтың күңелендә тик из­ге ниәттәр. Уның барлыҡ эштәре лә их­лас күңел ҡушыуы буйынса башҡарыла.
Фәниә Сәлимгәрәева.

Фото ғаилә архивынан алынды.