Яулайһы үрҙәр алда әле

Ҡыҙғанысҡа ҡаршы, һуңғы осорҙа хәрәкәтләнеү кәмене: ҡайҙа барһаҡ та, машинаға ултырыу яйын ҡарайбыҙ, күп эштәрҙе баш­ҡарыу ябайлашты, сөнки күптә­ре­беҙҙең өйҙәренә һыу, газ үткәрелгән, мал аҫраусылар ҙа юҡ кимәлендә. Бигерәк тә үҫеп килеүсе быуын өсөн хәүефле. Ваҡыттарының күп өлөшөн гаджеттар менән уҙғарыу уларҙың сәләмәтлектәрендә са­ғыл­май ҡалмай. Шуға күрә уларҙы бәләкәйҙән спортҡа йәлеп итеү мөһим. Иртән еңелсә физик кү­нек­мәләр эшләү, секцияларға йө­рөү йәш организм өсөн бик мөһим. Бәхеткә, спортты үҙ итеп, төрлө ярыштарҙа ҡатнашып, уңыштарға өлгәшеүсе малай-ҡыҙҙар ҙа юҡ түгел. Уларҙың тырышлығы, ныҡышмаллылығы күп­­тәргә өлгө булырлыҡ, сөнки спорт - ул беренсе сиратта үҙең, үҙең­дең ялҡаулығың менән кө­рәшеү.
Бөгөнгө геройым спорттың теннис төрөн һайлаған. Уны үҙ иткән Рәвил Баҙарғолов 2-се Ҡырмыҫ­ҡалы мәктәбенең 7-се кла­сында белем ала. Малай өҫтәл тен­нисы менән 1-се кластан шөғөл­ләнә башлаған. Ошо арауыҡ эсен­дә күп тапҡырҙар район туры призеры, мәктәп этабы еңеүсеһе лә була. Республика командалар берен­селегендә район коман­да­лары араһында Роман һәм Кирилл Макаровтар команда составында 2-се урын, быйыл республика Беренселегендә 2006 йылғылар һәм унан бәләкәйҙәр категорияһы араһында 59 ҡатнашыусынан 12-се урынға сыға. Бынан тыш, Рәвил башҡа төрлө спорт төрҙәре менән дә мауыға. Ул 2007-2008 йылғылар араһында мини-футбол буйынса райондың йыйылма командаһы ағзаһы булып тора, шахмат һәм шашка буйынса призлы урындар алыуға ла өлгәшә. ГТО-ның алтын билдәһенә лайыҡ булған. Тырыш, егәрле егет уҡыуҙа ла һынатмай – тик “бишле” билдәләренә генә өлгәшә.
Рәвил ҡустыһы Алмазды ла үҙе артынан спортҡа йәлеп иткән. 2-се Ҡырмыҫҡалы мәктәбендә уҡыусы Алмаз “Сәләмәт быуын көслө төбәк” проекты сиктәрендә бул­дырылған спорт класында белем ала. Ул да ағаһы кеүек өҫтәл тен­нисы менән шөғөлләнә. Мәктәп уҡыусылары араһында өҫтәл теннисы буйынса шәхси район Беренселегендә 2009 йылғылар һәм унан бәләкәйҙәр катего­рияһында тәүге тапҡыр 3-сө урын яулаған. Шулай уҡ мини-футбол һәм шахмат менән мауыға. Йәш уйынсы булыуына ҡарамаҫтан, призлы урындар алырға ла өлгөрә.
Эйе, уңышҡа ирешеү өсөн иң беренсе теләк, тырышлыҡ һәм үҙ маҡсаттарыңа тоғролоҡ кәрәк. Был сифаттар спорт менән шөғөл­ләнгәндәргә хас. Шуға Рәвилдең киләсәктә тағы ла юғарыраҡ үрҙәр яулауына шик юҡ.

Фирүзә РӘХМӘТУЛЛИНА

Автор фотоһы