Эш эҙләүе еңелләшә

Башҡортостан кешеләре илдә беренселәрҙән булып эш эҙләү өсөн мәшғүллек үҙәктәренең электрон хеҙмәттәре менән файҙалана аласаҡ. Эш биреүселәр шулай уҡ “Работа в России” порталы аша хеҙмәткәрҙәр һайлай ала.

– Башҡортостан эш эҙләүселәр менән эш биреүселәрҙең яңы формат буйынса эш итә башлаясаҡ илдең тәүге 19 төбәге исемлегенә эләкте. Был яңылыҡ граждандарҙың мәшғүллек үҙәктәре менән дөйөм эшмәкәрлегендә һанлы платформаны үҫтереү һәм электрон эш итеүгә күсеүҙең тәүге аҙымы буласаҡ, – тине республиканың ғаилә, хеҙмәт һәм халыҡты социаль яҡлау министрының беренсе урынбаҫар Юрий Мельников.

Хәҙер “Работа в России” сайтына инергә, ғариза тултырырға һәм уға үҙеңдең квалификацияң һәм эш стажы тураһындағы мәғлүмәте булған резюмеңды беркетеү ҙә етә. Һеҙгә тап килгән вакансия автоматик рәүештә эҙләнәсәк, унда мәғлүмәттәрҙе система үҙе анализлаясаҡ.

Мәшғүллек үҙәктәренең яңы формат буйынса эшләй башлауы граждандарҙы күп документтар йөрөтөүҙән азат итәсәк. Мәҫәлән, башҡаса хеҙмәт кенәгәһен, белем алыу тураһындағы мәғлүмәттәр һәм йәшәгән урын буйынса теркәләү кеүек документтарҙы күрһәтергә кәрәкмәйәсәк. Был мәғлүмәттәр системаға ведомство-ара хеҙмәттәшлек ярҙамында киләсәк.

Әгәр порталда эшләү буйынса консультация кәрәк булһа, граждандар мәшғүллек үҙәктәре белгестәренә мөрәжәғәт итә ала һәм улар ярҙам итәсәк. Мәшғүллек үҙәктәре телефондары хеҙмәттең интерактив порталында күрһәтелгән.

Кадрҙар үҙәгенә ни бары эшһеҙлек буйынса пособие алыуға дәғүә иткән кеше генә килә аласаҡ. Бының өсөн белгес уға осрашыу билдәләргә тейеш. Был кешене эшһеҙ тип таныған ҡарарҙы ҡабул итер өсөн кәрәк. Шул уҡ ваҡытта иҫәпкә ҡуйыу тураһындағы ғаризаны электрон төрҙә – “Работа в России” порталы аша бирергә була.

Кәрәкле эшселәрҙе табыуҙа ярҙамды кадр консультанттары шулай уҡ “Работа в России” порталындағы шәхси кабинет аша күрһәтәсәк. Берҙәм һанлы платформа аша базала барлыҡҡа килгән яңы резюмелар тураһында белдереү алып буласаҡ, шулай уҡ тәҡдимдәр ебәрә һәм ҡабул итә, кандидаттар менән аралаша, эш эҙләгәндәрҙе һөйләшеүгә саҡырып буласаҡ.

Башҡа төбәктәр был проектҡа киләһе йылдың ғинуарынан ҡушыласаҡ. Халыҡ мәшғүллеге үҙәктәрен модернизациялау – дәүләт проекты, ул үҙәк мәшғүллек үҙәктәре эшмәкәрлеген һөҙөмтәлерәк һәм сифатлыраҡ итеүгә йүнәлтелгән. Әле проектта 61 төбәктән 130 үҙәк ҡатнаша.

Сығанаҡ: https://pravitelstvorb.ru/ru/press-office/news.php?ELEMENT_ID=53559

Фото: Башҡортостан Хөкүмәте сайты.