Емереклек аҫтында ҡалған бала әсәһенә шылтыратҡан...

Бөгөн төшкә ҡарай Свердловск өлкәһенең Түбәнге Тагил ҡалаһында урынлашҡан биш ҡатлы йортта газ шартлай. Ашығыс хеҙмәттәрҙән хәбәр итеүҙәренсә, шартлау тулҡыны бер мәлдә ике подъезды тулыһынса юҡҡа сығара. Бынан тыш, һуңғараҡ тағы өс урындан өй өлөшләтә емерелеп төшә. 

Әлеге ваҡытта урында ҡотҡарыусылар эшләй һәм зыян күргәндәрҙе ҡотҡарыу менән була. Һуңғы мәғлүмәттәр буйынса, һигеҙ кеше йәрәхәтләнгән, уларҙың дүртәүһе балалар.Бер кеше һәләк булған. Бөтәһен дә емерелектәр араһынан ҡотҡарыусылар сығарған. Әйткәндәй, балаларҙың икәүһенә бер йәш тә тулмаған, өс айлыҡ ҡынаһы ла булған. Шулай уҡ үҫмерҙәр сығарылған, дүрт өлкән кеше зыян күргән.

Һуңғы мәғлүмәттәр буйынса, әле бөтә юғалған кешеләрҙе лә табып бөтмәгәндәр. 150-нән ашыу ҡотҡарыусы урында эшләй һәм емереклектәрҙе таҙарта. 47 техника йәлеп ителгән. Хәбәр ителеүенсә, бер бала шартлауҙан һуң шунда уҡ әсәһенә шылтыратҡан һәм аяғы ҡыҫылыуы тураһында әйткән. Әлеге ваҡытта был баланы эҙләйҙәр.

Телеграм-каналдар хәбәр итеүенсә, был йортта газ хеҙмәттәре 19 июлдә булған һәм барыһы ла яҡшы тигән. Яҡынса мәғлүмәттәр буйынса, газ подвалда йәки беренсе ҡаттағы фатирҙа шартлаған.

Фото: телеграм.