Көҙөн ниндәй һауа торошо көтә?

Көҙгөһөн Башҡортостанда ниндәй һауа торошо була? Синоптиктар күҙаллауҙары менән уртаҡлаша.

Рәсәй Гидрометеорология үҙәге мәғлүмәттәре буйынса, сентябрҙә уртаса һауа температураһы норманан бер градусҡа юғарыраҡ, йәғни +11,2 градустан юғарыраҡ буласаҡ. Айлыҡ яуым-төшөм нормаға ярашлы көтөлә – 35-55 миллиметр.

Башгидромет хәбәр итеүенсә, сентябрҙең тәүге көндәре эҫе була. 1 сентябрҙән 3-өнә тиклем көндөҙ +29 градусҡаса йылы булыуы фаразлана.

“Гисметео” порталы сентябрь аҙағына тиклем һауа торошон фаразлай. Уға ярашлы, айҙың тәүге яртыһы ярайһы уҡ йылы буласаҡ. Көндөҙ +18, +22 градус булыуы көтөлә. Ваҡыт-ваҡыт ямғырҙар яуасаҡ. Сентябрҙең икенсе яртыһында бер аҙ һалҡынайта — +13, +15 градусҡа тиклем, был да көҙ башы өсөн яҡшы.

“Фобос” үҙәгендә хәбәр итеүҙәренсә, октябрҙең беренсе декадаһы һалҡын һәм ямғырлы булыуы көтөлә. 1 октябрҙән 3-өнә тиклем һауа +11, +15 градусҡаса йылына. 4 октябрҙән 12-нә тиклем көндөҙ +1-ҙән +8 градусҡаса һалҡын булыуы фаразлана. 13 октябрҙән һауа температураһының киҫкен түбәнәйеүе көтөлә: төнгө сәғәттәрҙә -3 градусҡа тиклем һәм көндөҙ 0 градусҡа тиклем. 14 октябрҙә тәүге ҡар яуыуы көтөлә, төндә термометр бағанаһы -8 градусҡа тиклем төшә, көндөҙ -1 градусҡа тиклем йылыта. 15 октябрҙә төндә -13, көндөҙ -7 градус булыуы фаразлана.