Герой парталары асылды, турнир үтте

Рәсәй Федерацияһы һәм Башҡорто­стан Республикаһы флагтарын күтәреү хоҡуғы Афған һуғышында ҡатнашыусы майор Әнүр Әмир улы Хәлитовтың улы – “Ватан намыҫы өсөн” район конкур­сында еңеүсе команданың командиры Альвар Хәлитовҡа тапшырылды.

Волейбол турниры сиктәрендә Иҫке Бәпес мәктәбендә тағы ла бер изге эш башҡарылды. Ауылдашыбыҙ, ошо мәк­тәптең уҡыусылары, махсус хәрби опе­рацияла батырҙарса һәләк булған герой­ҙар – Фидан Фәрғәт улы Хоҙайғолов һәм Вәзих Фәрит улы Ноғоманов иҫтәлек­тәренә Герой парталары асыу танта­наһы уҙҙы. Илһөйәрлек рухы менән һуғарылған тантанаға яҡташ герой­ҙарҙың яҡындары, туғандары саҡырыл­ды. Афған һуғышында хәрби бурысын үтәгән, “Хәрби туғанлыҡ” ойошмаһы ағзаларының да был тантанала ҡатна­шыуы сараға тағы ла нығыраҡ патрио­тик рух өҫтәне. Яңы Бишауыл ауылынан яҡташыбыҙ Әхмәт Хөснетдинов Иҫке Бәпес мәктәбендә эшләп килгән ҡурай класына (уҡытыусыһы Имза Биктиме­ров) ҡурай бүләк итте.

Иҫке Бәпес ауылы хакимиәте башлығы Азамат Ғәйфуллин, Фидан­дың әсәһе Фәүриә Абуталипова, ҡатыны Альбина Хоҙайғолова, Вәзихтең апаһы Рәмилә Фәхретдинова тантанлы рәүеш­тә Герой парталарын асты. Фәүриә Әсҡәт ҡыҙы менән Рәмилә Наил ҡыҙы махсус хәрби операцияла һәләк булған яҡында­ры тураһындағы яҡты хәтирәләре менән бүлеште. Фәүриә Абуталипованың улы Фиданға арнап яҙған, яҡташ шағирәбеҙ Фирүзә Абдуллинаның махсус хәрби операцияла ҡатнашыусыларға бағыш­лаған йөрәк тетрәндергес шиғырҙары күптәрҙең күҙҙәрен йәшләнергә мәжбүр итте. Азамат Муса улының һәм Әхмәт Фән улының ялҡынлы сығыштары ла бер кемде битараф ҡалдырманы.

Батырҙарса һәләк булған яҡташта­рыбыҙҙы бер минутлыҡ тынлыҡ менән иҫкә алғас, Иҫке Бәпес ауылы мәҙәниәт йортоноң мәҙәни ойоштороусыһы Ил­дар Хәсәнов барлыҡ ҡунаҡтарға илһөй­әрлек рухындағы йырын бүләк итте.

Азамат Муса улы Рәсәй Геройы, ге­нерал-майор Миңлеғәле Шайморатов иҫтәлегенә арналған “Шайморатов ку­богы”ның волейбол буйынса 42-се ре­спублика турнирында район ветеран­дары командаһы составында 3-сө урын яулаусы Рамаҙан Шаймарҙановҡа һәм Юнир Дилмөхәмәтовҡа миҙалдар һәм кубок тапшырҙы. Тантаналы өлөштән һуң ҡыҙыу рәүештә волейбол ярышы башланып китте. Был волейбол турни­рында Иҫке Бәпестән ике команда һәм Иҫке Муса, Ҡарлыман, Ефремкин, Яңы Бәпес ауылдарынан берешәр команда ҡатнашты.

Көсөргәнешле уйын һөҙөмтәләре буйынса Иҫке Бәпес ауылының беренсе командаһы еңеү яуланы. Икенсе урынға Ефремкин, ә өсөнсөгә иһә Иҫке Бәпес ауылының икенсе командалары сыҡты.

Яҡташ батырҙарыбыҙҙың яҡты иҫтә­легенә арналған был сара уҡыусыларҙа илһөйәрлек тойғолары тәрбиәләүҙә ҙур роль уйнар, тип ышанабыҙ.

Гөлназ ҒАФФАРОВА,

Иҫке Бәпес ауылы мәҙәниәт йортоноң мәҙәни ойоштороусыһы.