Ысын көс берҙәмлектә һәм үҙ-ара аңлашыуҙа!

Унда район мәктәптәренең ете командаһы ҡатнашты. Бөй­өк Ватан һуғышында Еңеүҙең 80 йыллығына арналған быйылғы сараны ойоштороусылар – рай­он хакимиәтенең йәштәр сәй­әсәте, физкультура һәм спорт бүлеге, район мәғариф бүлеге.

“Ватанды һаҡлаусылар” хәр­би-патриотик конкурсы күптән инде ябай спорт ярышынан ҡаһарманлыҡ, рух көсө һәм ко­мандалар берлеге байрамына әүерелде. Ысын һалдаттарҙы хәтерләткән уҡыусыларҙың күҙҙәренән осҡон сәселеп тора һәм уларҙың һәр береһе үҙҙәрен тик яҡшы яҡтан ғына күрһәтеү теләге менән янды.

- Ошондай саралар даи­ми уҙғарылыуына бик шат­мын. Бигерәк тә бөгөнгө көн­дә илһөйәрлек тәрбиәләү бик мөһим һәм кәрәкле. Илебеҙҙә йәшәүселәрҙең барыһы ла үҙе­нең Ватанын һаҡларға әҙер булырға тейеш. Һеҙгә яҡшы уҡырға, яңы технологиялар үҙләштерергә кәрәк. Быларҙың барыһы ла киләсәктә кәрә­гәсәк. Дошман тик ятмай.

Быйыл беҙ Бөйөк Ватан һуғышында Еңеүҙең 80 йыл­лығын билдәләйбеҙ, ә өс йыл элек фашизм яңынан күтәрел­де. Һеҙҙең ағайҙарығыҙға, атай-олатайҙарығыҙға тағы ла Ватан һағына баҫырға тура кил­де. Ошондай конкурстарҙа ҡат­нашып, һеҙ илебеҙ тыныслығын нисек һаҡларға өйрәнәһегеҙ, - тине Ҡырмыҫҡалы һәм Архан­гел райондары хәрби комисса­ры Рөстәм Вәлитов.

Мәртәбәле жюри ағзала­ры – район мәғариф бүлеге начальнигы урынбаҫары Гүзәл Сыңғыҙова, Ветерандарға, ин­валидтарға һәм инвалид балаһы булған ғаиләләргә ярҙам фонды рәйесе Рөстәм Әминев, “Гарик” ҡушаматлы махсус хәрби опера­цияла ҡатнашыусы конкурстың һәр этабына үҙҙәренең баһала­рын ҡуйҙы.

Конкурсанттарҙың барыһы ла физик әҙерлектән тыш ижади һәләттәрен, командала эшләй белеүҙәрен һәм Тыуған илгә хеҙмәт итергә әҙер булыуҙарын күрһәтә алды. Бындай саралар үҫмерҙәрҙе һәм йәштәрҙе яңы ҡаҙаныштарға илһамландыра һәм ғүмер буйы уларҙы оҙатып барасаҡ ҡиммәттәрҙе форма­лаштыра.

Әйткәндәй, финал турына Иҫке Бәпес, Малай, Прибель­ский, Илтирәк ауылдары мәк­тәптәре, Ҡабаҡ лицейы, Ҡыр­мыҫҡалы гимназияһы һәм 2-се мәктәбе сыҡты.

Финалда ҡатнашыусыларҙың барыһын да еңеүсе тип әй­тергә була, сөнки улар был кон­курс һынауҙарына әҙерләнгән саҡта тағы ла көслөрәк, тағы ла таһыллыраҡ һәм белемлерәк булды.

Финал барышында улар строй менән йөрөү, Ватан та­рихы һәм медицина буйынса белемдәрен, физик әҙерлек­тәрен күрһәтте, ижади сығыш яһанылар, хәрби эстафетала ҡатнаштылар.

Сараны ойоштороусы­лар һәм жюри ағзалары бил­дәләүенсә, һуңғы йылдарҙа командаларҙың әҙерлеге күпкә юғары. Уҡыусылар һәм уларҙың етәкселәре был конкурсҡа етди ҡарайҙар һәм йылдан-йыл ка­миллаштыра баралар. Ярыш рухы барыһын да команда эше­нең мөһимлеген аңларға һәм шәхси үҫешкә дәртләндерә, илһамландыра.

Конкурс йомғаҡтары буйынса еңеүселәр түбәндәгесә билдәләнде:

1-се урын – Ҡырмыҫҡалы­ның 2-се мәктәбе;

2-се урын – Прибельский мәктәбе;

3-сө урын – Ҡырмыҫҡалы гимназияһы, Ҡабаҡ лицейы.

Был көндө 30 уҡыусы “Юнармеецтар” хәрби хәрәкәте рәтенә алынды.

“Ватанды һаҡлаусылар” хәрби-патриотик конкурсы кеүек саралар йәмғиәтебеҙ өсөн мөһим булған йолаларҙы һәм ҡиммәттәрҙе нығытыуға бу­лышлыҡ итә. Конкурста ҡат­нашыу – ул үҙеңде күрһәтеү мөмкинлеге генә түгел, ә ысын көстөң берҙәмлектә һәм үҙ-ара аңлашыуҙа булыуын күрһәтеү ысулы ла!

Марина ВИКТОРОВА.