Район башлығы студенттар менән осрашты

Район башлығы студенттар менән осрашты

Баш ҡалала белем алыусы студенттар менән йыл һайын район хакимиәте башлығы Әлфир Сабиров һәм башҡа район белгестәре осрашыу ойоштора. Быйылғы осрашыу ҙа әһәмиәтле үткән.

Яҡташ студенттар менән осрашыуҙан алып ҡайтҡан тәьҫораттары менән “СтендМастер” яуаплылығы сикләнгән йәмғиәттең генераль директоры Радмир Ис­ламов бүлеште.

- Студенттар менән күрешергә ҙур ғына де­легация менән барҙыҡ. Был, әлбиттә, ябай осрашыу ғына булманы. Сарала йәш яҡташта­рыбыҙ менән фекер алыштыҡ, уларҙың проблемалары хаҡында белештек. Йәнле әң­гәмә барышында райо­ныбыҙ мөмкинлектәре тураһында бәйән иттек, үҙебеҙҙең районға эшкә ҡайтҡан йәш белгестәр менән таныштырҙыҡ. Районыбыҙҙа эшләүҙең ыңғай яҡтары, бында барлыҡ шарттар ты­уҙырылыуы һәм карье­ра буйынса үҫергә ҙур мөмкинлектәр барлығы хаҡында конкрет миҫал­дар килтерелде. Район эшҡыуарҙарының ауыл ерендә лә эшҡыуарлыҡ эшен киң йәйелдереп ебәреүе хаҡындағы мәғлүмәттәр менән бүлештек. Эйе, ауыл ерендәге эшҡыуарлыҡ эшендә хәҙерге заманда логистика өлкәһенең, интернеттың ярҙамы ҙур. Ауылда эшләүе ба­рыбер ҙә яҡшыраҡ һәм еңелерәк тип тә әйтә алам. Тыуған ереңдә хеҙмәт итеүҙең өҫтөн­лөктәре күп.

Йәп-йәш кенә егет-ҡыҙҙар ҡалаларға сығып китеп, үҙ тыуған ерҙәрен, төп йорттарын онотмаһын өсөн ошо­ноң кеүек осрашыуҙар, аралашыуҙар кү­берәк булһын, тигән теләктәмен. Беҙҙең делегацияла төрлө хеҙмәт вәкилдәренең, район башлығы һәм уның урынбаҫарҙа­ры, баш табиптың, йәш белгестәрҙең, эшҡыуарҙарҙың булы­уы отошло ине тигән фекерҙәмен. Беҙ сту­денттарға үҙебеҙҙең уй-фекерҙәребеҙҙе, теләктәребеҙҙе еткерер­гә өлгәшкәнбеҙҙер, тип ышанам. Осрашыуҙан бик яҡшы тәьҫораттар алып ҡайттым. Шуны ла әйткем килә: бер рай­онда йәшәһәк тә, һәр кемебеҙ үҙ эше менән мәшғүл булып, бергәлә­шеп осрашып һөйлә­шергә лә ваҡыт тапмай­быҙ. Осрашыуға барған һәм ҡайтҡан саҡта делегация вәкилдәре менән үҙ-ара әңгәмәлә­шергә, фекер алышырға ла мөмкинлек тыуыуы ҡыуандырҙы. Иҫтәлек­кә фотоға ла төштөк. Ошондай шәп осрашы­уға саҡырғандары өсөн рәхмәтлемен, - ти Рад­мир Рәжәп улы.

Районыбыҙ йәштәре үҙ тыуған яҡтарын онот­маҫтар, уҡып бөткәс тә был яҡтарға кире әйлә­неп ҡайтырҙар, тигән өмөттәр бағлайбыҙ.