Ижади рух һәм илһам алдыҡ

Ижади рух һәм илһам алдыҡ

Быйыл да “Даирә” гәзите менән даими хеҙмәттәшлек иткән, төрлө конкурстарҙа әүҙем ҡатнашҡан дуҫтарыбыҙ менән иҫәнлектә-һаулыҡта осрашырға яҙҙы. Улар менән күрешеүҙе беҙ һәр йыл һайын көтөп алабыҙ.

Ҡунаҡтарыбыҙҙы тә­брикләп, “Даирә”нең баш мөхәррире Гөлсәсәк Ала­сова гәзиттең эшмәкәрле­ге һәм яңылыҡтары менән бүлеште.

- Гәзиткә заман талап­тарына ярашлы яңылыҡтар индерәбеҙ. Уҡытыусы һәм остаз йылына арналған про­ектта ҡатнашып, грант алы­уға өлгәштек. Ҡыҙғанысҡа, гәзитебеҙ уҡыусылары йылдан-йыл олоғая бара. Йәштәр яңылыҡтарҙы кү­берәк интернет селтәренән уҡый, сөнки улар ҡағыҙ гәзитте ҡулға тотоп уҡып өйрәнмәгән. Шуға күрә “Даирә” гәзитенең интер­неттағы төркөмдәрен дә үҫтерергә, төрлө ҡыҙыҡлы конкурстар үткәрергә ты­рышабыҙ. Уның эшен тағы ла йәнләндереү маҡсатын­да һеҙҙән дә ярҙам көтөп ҡалабыҙ. Ниндәй ҙә булһа мәғлүмәткә эйә булһағыҙ, тиҙ генә яҙып йәиһә фо­тоға төшөрөп беҙгә ват­сап аша ебәрә алаһығыҙ. Һәр ауылда тиерлек әүҙем ҡәләмселәребеҙ булыуы ҡыуандыра. Беҙгә һеҙҙең һәр берегеҙ ҡәҙерле, һәр берегеҙҙе көтөп алабыҙ һәм киләсәктә лә һеҙҙән тарих, әхлаҡ, тәрбиә темаларына, булдыҡлы яҡташтарыбыҙ, күркәм ғаиләләр тураһында мәҡәләләр көтәбеҙ. Арта­бан да шулай бергә ҡалай­ыҡ һәм милли баҫмабыҙҙы һаҡлап ҡалыуға ҡулдан килгәнсе өлөш индерәйек, - тине ул һәм ҡунаҡтарҙың һәр береһенә Маҡтау ҡағыҙҙары, Рәхмәт хаттары һәм бүләктәр тапшырҙы.

Иң тәүҙә 2023 йыл лауре­аттарын - йәшәйеш хаҡын­дағы шиғырҙары, ҡыҙыҡлы мәҡәләләре һәм конкур­старҙа әүҙем ҡатнашҡаны өсөн Яңы Ҡыйышҡынан Әлиә Рәхимованы; ҙур күләмле эстәлекле очер­ктары, тыуған яҡ хаҡын­да йөкмәткеле шиғырҙары өсөн Ҡарлымандан Фәрғәт Ҡотлобаевты билдәләп үт­тек. Байрамыбыҙға килә алмаусы Үтәгәндән Миң­нифә Батталованың (хис­ле һәм патриотик рухлы нәҫерҙәре өсөн) һәм Иҫке Мусанан Фәниә Юнысова­ның (“Хәйҙәр тауы” хикәй­әһе һәм “Сөгөлдөр баҫыуы ҡайҙа?” тигән мәҡәләһе өсөн) бүләктәре көтөп ҡала.

Яңы йылға бағышланған шиғырҙар конкурсында еңеүселәр: Ҡырмыҫҡа­лынан Ғәлимә Тимерға­зина, Үтәгәндән Гәүһәрә Моталлапова (шулай уҡ “Тормош матур булмаҫ ине һағыныр иҫәлектәр булмаһа” конкурсында еңеүсе); “Атайсалым – тыуған яғым” конкурсы еңеүселәре: Иҫке Бәпестән Миңниса Камалова (килә алманы) һәм Фирүзә Абдул­лина, Бишауыл-Уңғарҙан Динә Мөлҡаманова, Яңы Бишауылдан Мәрүәр Иш­моратова (шулай уҡ Яңы йылға бағышланған шиғы­рҙар конкурсында еңеүсе), Иҫке Шәрәйҙән Мәүлиҙә Тажетдинова һәм Үтәгән­дән Зөлфиә Әсфәндийәро­ва; “Уҡытыусым – яҡты ҡояш” конкурсы призеры Ҡарлыманбаштан Гөлна­ра Иҫәнғолова; “Тормош матур булмаҫ ине һағыныр иҫәлектәр булмаһа” кон­курсы еңеүсеһе Ибраһим­дан Сажиҙә Әхмәҙиевалар билдәләнде. Ә Иҫке Бәпес ауылы китапханаһының “Кәрәҙ” ижади түңәрәге етәксеһе Фәүриә Абутали­пова “Даирә” гәзите менән әүҙем хеҙмәттәшлек иткәне өсөн бүләкләнде.

Гәзиттең төрлө бәй­геләрендә ҡатнашып, призлы урындар алған Ҡырмыҫҡалынан Гөл­нур Әхмәҙиева, Биша­уыл-Уңғарҙан Фәнзилә Хи­самова һәм “Даирә” гәзите менән әүҙем хеҙмәттәшлек итеүсе Бишауыл-Уңғарҙан Рим Исхаҡов осрашыуҙа була алманы. Уларҙы ла бүләктәре көтә.

Әлбиттә, ҡунаҡтары­быҙҙың һәр береһе һүҙ оҫтаһы булараҡ, үҙ сират­тарында теләк-фекерҙәре, ижади гөлләмәләре менән бүлешмәйенсә булдыра ал­манылар.

“Шиғыр яҙған һәр кем

Ул шағирә түгел.

Шиғыр яҙыу – күңел

талабы.

Күңелемә ҡунһа

илһам ҡошо,

Мин ҡулыма ҡәләм ала­мын”, - тип һүҙ башланы һәр шиғырын яттан һөй­ләүсе яҡташыбыҙ Сажиҙә Әхмәҙиева.

- Шундай ҙур эштәр башҡараһығыҙ, ғәмәл дәфтәрҙәренә Хоҙай Тәғәләнән сауап булһын үҙегеҙгә. Ҡу­наҡтарҙың барыһы ла иҫ киткес шиғырҙар ижад итә, мәҡәләләр яҙа. Гәзит бит­тәренән уларҙың ижадын ҡат-ҡат уҡыйым, - тип дауам итте шиғри күңелле Зөлфиә Әсфәндийәрова.

- Бәләкәй генә бала­ларҙың ижадын ҙур итеп күккә күтәреп, уларҙың һәм ата-әсәләрҙең күңелдәрен күтәргәнегеҙ өсөн ҙур рәх­мәт, - тип ҡушылды һүҙгә Фәүриә Абуталипова.

- Күптәр менән ошоға тиклем тик гәзит биттәре аша ғына таныш инек. Беҙҙе ҡунаҡҡа саҡырып, яҡындан танышырға форсат биргәндәре өсөн “Даирә” хеҙмәткәрҙәренә рәхмәт. Улар – районыбыҙ тормошон яҡтыртыусы­лар. Яҙам тиһәң, темалар ҙа бик күп, әммә илебеҙҙә барған ваҡиғалар арҡаһын­да һуңғы ваҡытта ҡулдан ҡәләм төштө. Башҡорто­станыбыҙҙың киләсәге, халҡыбыҙҙың үҫеше, бала­ларыбыҙҙың тыныс тормо­шта һәм саф һауала йәшәүе тигән сәпкә табан төрлөбөҙ төрлө юлдарҙан барабыҙ. Юлдарыбыҙ уң булһын, - тигән күңел түренән сыҡҡан һүҙҙәрен еткерҙе Фәрғәт Ҡотлобаев.

- Эйе, һәр беребеҙ үҙе­беҙсә уйлайбыҙ, ләкин ба­рыбыҙҙың да уйҙарыбыҙ бер нимәгә – Башҡорто­станыбыҙға һәм Рәсәйе­беҙгә әйләнеп ҡайта. Мо­стай Кәрим әйтмешләй, рус түгелмен, ләкин росси­ян мин. Ысынлап та, ҡул­дан ҡәләм төштө, күңел­дә тынғылыҡ юҡ, - тигән һүҙҙәренә ҡушып, үҙенең йөрәк ҡылдарын тирбә­терлек шиғырҙарын теҙҙе Фирүзә Абдуллина.

Уның һүҙҙәрен йөпләп, Динә Мөлҡаманова ла шиғыр юлдары аша күңел зарын еткерҙе:

“Һуғыш тигән оран

тиҙ арала

Илем киңлектәрен иңләне.

Әсе ҡайғы менән

күҙ йәштәре

Ил өҫтөндә ауыр

иң ләне...”

Ә беҙ инде ошо шиғри күңелле, ижади ҡарашлы кешеләр йыйылған ерҙә һәр сығыш яһаусыны рәхәтлә­неп тыңланыҡ, күңелебеҙҙе байыттыҡ, артабан эшләр­гә ижади рух һәм илһам ал­дыҡ.

Ҡунаҡтарыбыҙ башҡа йылдарҙа сәй табынын­да күңелле хәбәрҙәр һөй­ләшеп, йырлашып ул­тырһалар, был юлы һүҙ күберәк илебеҙҙә барған хәл-ваҡиғалар тирәһендә уралды. Илебеҙгә тиҙерәк тыныслыҡ килһен тигән теләк берләштерҙе уларҙың барыһын да.

- Дәртле йырҙар һуҙыр көндәр алда булыр әле. Беҙҙең ижадты хөрмәт ит­кәнегеҙ һәм беҙҙе бергә йыйғанығыҙ өсөн рәхмәт, - тип таралышты ҡунаҡта­рыбыҙ.

Розалия БИКТИМЕРОВА.